ମାଲିକ ଘରେ କଳାକନା ବୁଲାଇବାକୁ ଚାକରାଣୀ କରିଥିଲା ଯୋଜନା । ଏଥିରେ ସହଯୋଗ କରିଥିଲେ ତାର ପୁଅ ଓ ସ୍ବାମୀ । ଯୋଜନା ଅନୁସାରେ ଚାକରାଣୀ ରୋଷେଇ କରିବା ବେଳେ ସେଥିରେ ନିଦ ବଟିକା ମିଶାଇ ଦେଇଥିଲା । ଘରର ଲୋକମାନେ ସେହି ଖାଦ୍ୟ ଖାଇ ଗାଢ଼ ନିଦରେ ଶୋଇ ପଡ଼ିଲେ ଆଉ ଏହାର ସୁଯୋଗରେ ଚାକରାଣୀ, ତାର ସ୍ବାମୀ ଓ ପୁଅ ଘରୁ ୧୦ ଲକ୍ଷ ଟଙ୍କାର ସୁନା ଅଳଙ୍କାର ଓ ନଗଦ ଟଙ୍କା ନେଇ ଚମ୍ପଟ ମାରିଲେ । ଘଟଣାଟି ଘଟିଛି ହରିଆଣାର ଫରିଦାବାଦ ଅଞ୍ଚଳରେ । ପୁଲିସ ଘଟଣାର ଅନୁସନ୍ଧାନ କରି ଚାକରାଣୀ ଓ ଏଥିରେ ସହଯୋଗ କରିଥିବା ତାର ପୁଅ, ସ୍ବାମୀଙ୍କୁ ଗିରଫ କରିବା ପରେ ଏ ସମ୍ପର୍କରେ ଜଣାପଡ଼ିଛି ।
ଗତ ଜୁଲାଇ ୧୫ ତାରିଖରେ ଫରିଦାବାଦ ସେକ୍ଟର ୯ ଅଞ୍ଚଳରେ ଜଣେ ବ୍ୟବସାୟୀ ଇନ୍ଦ୍ରଜିତ ସିଂହଙ୍କ ଘରେ ଚୋରି ହୋଇଥିଲା ପ୍ରାୟ ୧୦ ଲକ୍ଷ ଟଙ୍କାର ମୂଲ୍ୟବାନ ଗହଣା ଓ ନଗଦ ଟଙ୍କା ଚୋରମାନେ ଲୁଟି ନେଇଥିଲେ । ଇନ୍ଦ୍ରଜିତ୍ ଏ ସମ୍ପର୍କରେ ପୁଲିସରେ ଅଭିଯୋଗ କରିଥିଲେ । ଅନୁସନ୍ଧାନ ବେଳେ ପୁଲିସର ସନ୍ଦେହ ଚାକରାଣୀ ଉପରେ ହୋଇଥିଲା । ମାତ୍ର ତାଙ୍କୁ ଖୋଜାଖୋଜି କରିବାରେ ସେ ଫେରାର ହୋଇ ଯାଇଥିଲା । ପୁଲିସ ତାର ଘରେ ଚଢ଼ଉ କରିଥିଲା ମାତ୍ର ଚାକରାଣୀ ମିଳି ନ ଥିଲା । ଶେଷରେ ପୁଲିସ ଚତୁରତାର ସହ ତିନିଜଣଙ୍କୁ ଗିରଫ କରିଥିଲା । ସେମାନଙ୍କ ଘରୁ ସବୁ ଗହଣା ସହ ନଗଦ ୫୦ ହଜାର ଟଙ୍କା ଜବତ କରିଥିଲା ପୁଲିସ । ଚାକରାଣୀକୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି । ତାର ସ୍ବାମୀ ଓ ପୁଅକୁ ପୁଲିସ ରିମାଣ୍ଡରେ ନେଇଥିବା ସୂଚନା ମିଳିଛି ।
