କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସିଙ୍ଗାରି ପଞ୍ଚାୟତର ଛତାପଦର ନିକଟ କଲ୍ୟାଣୀ ନଦୀରେ ପଡିଥିବା (ୱେଲିବ୍ରିଜ) ଆଇରନ ପୋଲର ଲୁହା ଛଡ଼ ଚୋରା ଚାଲାଣ କରୁଥିବା ବେଳେ ସ୍ଥାନୀୟ ପୁଲିସ ୫ଜଣଙ୍କୁ ଗିରଫ କରିବା ସହ ପିକପ୍ ଗାଡି ଓ ବାଇକ ଜବତ କରିଛି। ଏଥିସହ କେସ୍ ନମ୍ବର ୯୯ ଦଫା ୩୭୯/୩୫୩/୩୪ ଆଇପିସିରେ ମାମାଲ ରୁଜୁ କରି କୋର୍ଟ ଚାଲାଣ କରାଯାଇଛି।
ପୁଲିସ କହିବା ଅନୁଯାୟୀ, ବୁଧବାର ସନ୍ଧ୍ୟା ସମୟରେ କିଛି ଦୁର୍ବୃତ୍ତ ଛତାପଦର ନିକଟକଲ୍ୟାଣୀ ନଦୀରେ ପଡିରହିଥିବା (ୱେଲିବ୍ରିଜ)ଆଇରନ ପୋଲରୁ ଲୁହା ଛଡ ଚୋରାଇ ନେଉଥିବା ସୂଚନା ପାଇ ସ୍ଥାନୀୟ ପୁଲିସ ଘଟଣା ସ୍ଥଳରେ ପହଞ୍ଚିବା ବେଳେ ଗାଡିଟି ଚାଲି ଯାଉଥିବା ଦେଖି ତାକୁ ଘଉଡ଼ାଇ ଥିଲେ । ବିଜେପୁର ନିକଟରେ ଉକ୍ତ ପିକଅପ୍ ଗାଡି ନମ୍ବର ଓଡ଼ି ୦୮ହେଚ ୨୧୩୬ ଓ ବାଇକ ଓଡ଼ି୦୮ ପି ୫୩୫୫କୁ କାବୁ କରି ସ୍ଥାନୀୟ ଥାନାକୁ ଆଣିଥିଲେ । ଏଠାରେ ସିଙ୍ଗାରି ଗ୍ରାମର ଗାଡି ମାଲିକ ଚନ୍ଦନ ଗୌଡବିସି (୪୮), ତ୍ରିନାଥ ଗୌଡ଼ବିସି (୨୦), କର୍ଷିକା ଲାଇମାଝୀ (୨୧), ଛତାପଦର ଗ୍ରାମର ସୁକୃ ମାଝୀ(୨୫) ଓ ହୁଈକା ରାମଦାସ(୧୯)ଙ୍କୁ ପଚରାଉଚରା କରିଥିଲେ । ଆଜି ସେମାନଙ୍କର ଡ଼ାକ୍ତରୀ ପରୀକ୍ଷା କରି କୋର୍ଟ ଚାଲାଣ କରିଥିବା ଥାନା ଅଧିକାରୀ ସୁକୁମା ହଂସୁଦା କହିଛନ୍ତି। ୨୦୧୭ ମସିହା ଜୁଲାଇ ୧୬ ତାରିଖରେ ନାଗାବଳୀ ଓ କଲ୍ୟାଣୀ ନଦୀରେ ପ୍ରଳୟଙ୍କରୀ ବନ୍ୟା ଆସି ଉକ୍ତ ବ୍ଲକରେ ୧ଟି ପୋଲ, ୪ଟି ୱେଲିବ୍ରିଜ, ୧ଟି ଝୋଲା ପୋଲ ଭସାଇ ନେଇଥିଲା । ସେହି ୱେଲି ବ୍ରିଜଠାରୁ ଲୁହା ନେଇ ଭବାନୀପାଟଣାରେ ବିକ୍ରି କରିଦେଉଥିବା କହିଛନ୍ତି।
