ନୂଆଦିଲ୍ଲୀ : ଆମ ଆଦମୀ ପାର୍ଟି (ଆପ)ର ରାଷ୍ଟ୍ରୀୟ ଆବାହକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ସହ ଦିଲ୍ଲୀ ପ୍ରଦେଶ କଂଗ୍ରେସର ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦିକ୍ଷୀତଙ୍କ ସାକ୍ଷାତକାରକୁ ନେଇ ରାଜନୈତିକ ମହଲରେ ଚର୍ଚ୍ଚା ଆରମ୍ଭ ହୋଇଯାଇଛି। ଏହାସହ ଆପ ଓ କଂଗ୍ରେସ ମେଣ୍ଟ ସାକାର ରୂପ ନେଇପାରେ ବୋଲି କେତେକ ରାଜନୈତିକ ସମୀକ୍ଷକ ଆଶା ବ୍ୟକ୍ତ କରିଛନ୍ତି। ସାମାଜିକ ଗଣମାଧ୍ୟମରେ ଅରବିନ୍ଦ କେଜରିୱାଲ ଏବଂ ଶୀଲା ଦିକ୍ଷୀତଙ୍କ ଭେଟାଭେଟିର ଫଟୋ ଭାଇରାଲ ହେବାରେ ଲାଗିଛି। ଏନେଇ ଶୀଲାଙ୍କୁ ପଚାରିବାରୁ ସେ ସିଧା ସଳଖ ଭାବେ ମେଣ୍ଟ ଖବରକୁ ଖାରଜ କରିଥିଲେ। ତେବେ ଏନେଇ କୌଣସି ନିଷ୍ପତ୍ତି ନିଆଗଲେ ଗଣମାଧ୍ୟମକୁ ଖବର ଦିଆଯିବ ବୋଲି ସେ କହିଛନ୍ତି। ଶୀଲା ଦିକ୍ଷୀତ କହିଛନ୍ତି ଯେ ଅରବିନ୍ଦ କେଜରିୱାଲଙ୍କ ସହ ତାଙ୍କର କୌଣସି କଥାବାର୍ତ୍ତା ହୋଇନାହିଁ। ସୂଚନା ଅନୁସାରେ ଦିଲ୍ଲୀ ଉପରାଜ୍ୟପାଳ ଅନୀଲ ବୈଜଲଙ୍କ ଘରେ ଗୁରୁବାର ଆୟୋଜିତ ଏକ କାର୍ଯ୍ୟକ୍ରମ ଅବସରରେ ଅରବିନ୍ଦ ଓ ଶୀଲା ପରସ୍ପରକୁ ଭେଟିଥିଲେ। ଦୁହେଁ କର ମର୍ଦ୍ଧନ କରିବା ସହ କିଛି ସମୟ କଥା ହୋଇଥିଲେ। ଏହି ସାକ୍ଷାତକାର ପରେ ଲୋକସଭା ନିର୍ବାଚନ ପାଇଁ ଆପ ଓ କଂଗ୍ରେସ ମେଣ୍ଟ ନେଇ ଚର୍ଚ୍ଚା ହେଉଛି।
