ଭୁବନେଶ୍ୱର : ଶ୍ରୀମନ୍ଦିର ପରି ଏକାମ୍ରକ୍ଷେତ୍ର ଝଟକିବ। କୋଷେ ଦୂରରୁ ଶ୍ରଦ୍ଧାଳୁ ଶ୍ରୀଲିଙ୍ଗରାଜ ମନ୍ଦିର ରୂପକୁ ଦେଖି ଅଭିଭୂତ ହେବେ। ପୁରୀ ଶ୍ରୀମନ୍ଦିର ଆଇନ ଢାଞ୍ଚାରେ ଶ୍ରୀଲିଙ୍ଗରାଜଙ୍କ ଆଇନ ପ୍ରଣୟନ ହେବ। ପୁରୀ ଓ ଏକାମ୍ରକ୍ଷେତ୍ରକୁ ଦୃଷ୍ଟିରେ ରଖି ସରକାର ବିଶ୍ବ ଐତିହ୍ୟ କରିଡରରେ ସାମିଲ କରିବା ଯୋଜନା ରଖିଛନ୍ତି। ପୁରୀ ଦର୍ଶନରେ ଯାଉଥିବା ଶ୍ରଦ୍ଧାଳୁ ଏକାମ୍ରକ୍ଷେତ୍ରର ମହାପ୍ରଭୁ ଶ୍ରୀଲିଙ୍ଗରାଜଙ୍କୁ ଦର୍ଶନ କରିବାର ସୁଯୋଗ ନେବେ। ଦୀର୍ଘ ୯ମାସ ପରେ ଶ୍ରୀମନ୍ଦିର ଭକ୍ତଙ୍କ ପାଇଁ ଖୋଲିବ। ବଡ଼ଦିନ ଓ ନୂଆବର୍ଷ ପୂର୍ବରୁ ଶ୍ରୀକ୍ଷେତ୍ରର ବଡ଼ଦାଣ୍ଡ ଭକ୍ତଙ୍କ ଗହଣରେ ହସି ଉଠିବ। ଶ୍ରୀମନ୍ଦିର ପରି ଶ୍ରୀଲିଙ୍ଗରାଜ ମନ୍ଦିର ଖୋଲିବ କେବେ ?
ଏହାକୁ ନେଇ ଭକ୍ତଙ୍କ ମନରେ ଆରମ୍ଭ ହୋଇଛି ଉତ୍ସୁକତା। ଆଗ ଅପେକ୍ଷା ଭୁବନେଶ୍ବରରେ କରୋନା ସ୍ଥିତି ସୁଧୁରିଛି। ସଂକ୍ରମଣ କମିଥିବାରୁ ପୁରୀ ଶ୍ରୀମନ୍ଦିର ଖୋଲିବା ଦିନ ଶ୍ରୀଲିଙ୍ଗରାଜ ମନ୍ଦିର ଖୋଲିବା ପାଇଁ ନିଷ୍ପତ୍ତି ଗ୍ରହଣ କରାଯାଉବୋଲି ବିଭିନ୍ନ ମହଲରେ ଦାବି ହୋଇଛି। ବଡୁ ନିଯୋଗ ସମ୍ପାଦକ କମଳାକାନ୍ତ ବଡୁ, ପୂଜାପଣ୍ଡା ନିଯୋଗ ସମ୍ପାଦକ ସଚ୍ଚିକାନ୍ତ ପୂଜାପଣ୍ଡା, ବ୍ରାହ୍ମଣ ନିଯୋଗ ସଭାପତି ଶ୍ୟାମସୁନ୍ଦର ମହାପାତ୍ର ପ୍ରମୁଖ ବିଏମ୍ସି କମିସନର, ଦେବୋତ୍ତର କମିସନର ଓ ଜିଲାପାଳଙ୍କ ସହ ସରକାର ଆଲୋଚନା କରି ମନ୍ଦିର ଖୋଲିବା ନିଷ୍ପତ୍ତି ନିଅନ୍ତୁ ବୋଲି କହିଛନ୍ତି।
ଅନ୍ୟପକ୍ଷରେ ବିଏମ୍ସି କମିସନର ପ୍ରେମଚନ୍ଦ୍ର ଚୌଧାରୀ କହିଛନ୍ତି, ଶ୍ରୀଲିଙ୍ଗରାଜ ମନ୍ଦିର ଖୋଲିବା ଉପରେ କୌଣସି ନିଷ୍ପତ୍ତି ନିଆଯାଇନି। ଆଲୋଚନା ପରେ ପଦକ୍ଷେପ ନିଆଯିବ।
