ଲଡୁଗାଁ: ଯେଉଁ ଜମିରେ ଦିନେ ଗାଈଗୋରୁ ଘାସ ଚରୁଥିଲେ ସେଠି ଏବେ ନିର୍ମାଣ ହେଲାଣି ପୋଖରୀ, ପାର୍କ, ବଡ଼ ବଡ଼ କୋଠା। ଅନେକ ଗୋଚର ଜମି ଲୋକଙ୍କ ଜବରଦଖଲରେ। ଗାଈଗୋରୁଙ୍କ ଚରାବୁଲା ପାଇଁ ଗୋଚର ଜମିଗୁଡ଼ିକ ଏବେ ସରକାରୀ କାଗଜ କଲମରେ ରହିଯାଇଛି। ଚରାବୁଲା ପାଇଁ ଗୋଚର ଜମି ନଥିବାରୁ ଗାଈଗୋରୁଙ୍କୁ କେଉଁଠି ଚରାଇବେ ତାକୁ ନେଇ ଚିନ୍ତାରେ ଗୋପାଳକ। ଏମିତି ଏକ ଅଭିଯୋଗ ନେଇ ତହସିଲଦାରଙ୍କ ଦ୍ୱାରସ୍ଥ ହୋଇଛନ୍ତି ଚୋରନି ଦୁଆର ଗ୍ରାମବାସୀ। କଳାହାଣ୍ଡି ଜିଲ୍ଲା କୋକସରା ବ୍ଲକ ଗୋତୋମୁଣ୍ଡା ପଞ୍ଚାୟତ ଅନ୍ତର୍ଗତ ଚୋରନିଦୁଆର ଗ୍ରାମରେ ଥିବା ସରକାରୀ ଗୋଚର ଜମିକୁ ଗ୍ରାମର କିଛି ମାଫିଆ ବଳ ପୂର୍ବକ ଜବରଦଖଲ କରି ଚାଷ କାର୍ଯ୍ୟ କରୁଛନ୍ତି। ଯାହାକୁ ନେଇ ଏବେ ଚିନ୍ତାରେ ଗୋପାଳକ। ଗ୍ରାମରେ ଥିବା ଗୋ ସମ୍ପଦ ଲାଳନପାଳନ ପାଇଁ ଚାରଣ ଜାଗା ନଥିବାରୁ ଗ୍ରାମର ଗୋପାଳକ ଅନେକ ଅସୁବିଧାର ସମ୍ମୁଖୀନ ହେଉଥିବା ବେଳେ ବାରମ୍ବାର ଜବରଦଖଲ କରି ଚାଷ କରୁଥିବା ଲୋକଙ୍କ ଅନାବାଦୀ ଗୋଚରକୁ ଖାଲି କରିବାକୁ କହିଲେ ଓଲଟା ଧମକଚମକ ଦେଉଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ନେଇ ଗୁରୁବାର ଚୋରନି ଦୁଆର ଗ୍ରାମର ହିମାଞ୍ଚଳ ପୁଝାରୀ, ଥବିର ଗୋପାଲ, ରାମେଶ୍ୱର ପୋଟା, ନରେନ୍ଦ୍ର ଗୋପାଳ, ଜଳନ୍ଧର ପଟେଲ, ଗଣେଶ ଚନ୍ଦ୍ର ବାଗଙ୍କ ସମେତ ଅଞ୍ଚଳବାସୀ କୋକସରା ତହସିଲଦାର ଦେବବ୍ରତ କରାଟିଙ୍କୁ ସରକାରୀ ଅନାବାଦୀ ଗୋଚର ଜମି ଉଚ୍ଛେଦ କରିବାକୁ ଲିଖିତ ଅଭିଯୋଗ କରିଛନ୍ତି।
କେବଳ ସେହି ଚୋରନିଦ୍ଵାର ଗ୍ରାମରେ ମାଫିଆ ଗୋଚର ଜମିଗୁଡ଼ିକୁ ଜବରଦଖଲରେ ରଖିଛନ୍ତି ତାହାନୁହେଁ। କୋକସରା ବିଭିନ୍ନ ଅଞ୍ଚଳରେ ଶହ ଶହ ଏକର ଗୋଚର ଜମି ରହିଛି ଯାହାକୁ ମୁଷ୍ଟିମେୟ ଦଖଲ କରି ରଖିଛନ୍ତି। ଏଠି ସେଠି ସବୁଠି ଲୋକେ ବେଆଇନ ଭାବେ ଗୋଚର ଜମିକୁ ଜବର ଦଖଲ କରି କିଏ ପୋଖରୀ ଖୋଳି ମାଛ ଚାଷ କରୁଛି ତ କିଏ ଘର ତିଆରି କରି ରହୁଛି। ଏତେ ପରିମାଣରେ ଗୋଚର ଜମି ଥାଇ ମଧ୍ୟ ଆଜି ଗୋପାଳକମାନେ ନିଜ ଗାଈ ଗୋରୁଙ୍କୁ ଚାରଣ କରାଇ ପାରୁନାହାନ୍ତି। ଯାହାଫଳରେ ରଖିଥିବା ଗାଈଗୋରୁ ବାହାର ରାଜ୍ୟକୁ ଚାଲାଣ ହୁଏ। ତେବେ କୋକସରା ତହସିଲ ଅଧିନରେ ଥିବା ଗୋଚର ଜମିଗୁଡ଼ିକୁ ଖୁବଶୀଘ୍ର ଚିହ୍ନଟ କରିବା ସହ ଦଖଲକାରୀ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବୁଦ୍ଧିଜୀବୀ ମହଲରେ ଦାବୀ ହେଉଛି। ଅଭିଯୋଗ ଉପରେ ଶୀଘ୍ର କାର୍ଯ୍ୟାନୁଷ୍ଠାନ ନିଆଯିବ ବୋଲି ତହସିଲଦାର ଦେବବ୍ରତ କରାଟି ସୂଚନା ଦେଇଛନ୍ତି।
Comments are closed.