ହରଭଙ୍ଗା : ନୟାଗଡ ମହାନଦୀ ବନ୍ୟପ୍ରାଣୀ ବନଖଣ୍ଡ ଅଧିନ କୁଶଙ୍ଗ ବନ୍ୟପ୍ରାଣୀ ଅଭୟାରଣ୍ୟର ମାରଡା ବିଟ୍ ଅଂଚଳରୁ ବନ୍ୟପ୍ରାଣୀ ବିଭାଗ ବନ୍ଧୁକ ସହ ଜଣେ ଶୀକାରୀକୁ ଗିରଫ କରିଛି। ଗିରଫ ଶିକାରୀ ଜଣଙ୍କ ହେଉଛନ୍ତି ମାନସ ପ୍ରଧାନ(୪୫) । ତା’ ଘର ନୟାଗଡ ଜିଲ୍ଲା ଖଣ୍ଡପଡା ଥାନା ବଡ ବାଣପୁର ବୋଲି ବିଭାଗ ପକ୍ଷରୁ ସୂଚନା ମିଳିଛି । ମିଳିଥିବା ସୂଚନା ଅନୁସାରେ ଗତ ଗୁରୁବାର ବିଳମ୍ବିତ ରାତ୍ରୀରେ କୁଶଙ୍ଗ ବନ୍ୟପ୍ରାଣୀ ରେଞର ଶୀତଳପାଣି ସେକ୍ସନର ମାରଡା ଫରେଷ୍ଟ ବିଟ ଅଂଚଳରେ ମାନସ ପ୍ରଧାନ ଅନ୍ୟ ଜଣେ ସହଯୋଗୀ ଏକ ଚୋରା ଖେଞ୍ଚା ବନ୍ଧୁକରେ ଶୀକାର ଉଦ୍ୟମ କରୁଥିଲେ। ପରୀକ୍ଷା ମୂଳକଭାବେ ଗୋଟିଏ ଗୁଳି ଫୁଟାଇଥିଲେ। ଗୁଳି ଶଦ୍ଦ ଶୁଣି ପେଟ୍ରୋଲିଂ ଟିମ୍ ଏମାନଙ୍କ ପିଛା କରିବା ସହ ମାନସକୁ କାବୁ କରିଥିଲେ। ତା’ ପାଖରୁ ଏକ ଚୋରା ବନ୍ଧୁକ ସହ ଶିଶା, ବାରୁଦ ଭଳି ଗୁଳି ତିଆରି ସାମଗ୍ରୀ ଜବତ କରିଥିଲେ । ଏହି ଘଟଣାରେ କୁଶଙ୍ଗ ବନ୍ୟପ୍ରାଣୀ ବିଭାଗ ପକ୍ଷରୁ ଏକ ମାମଲା ରୁଜୁକରି ଅଭିଯୁକ୍ତ ମାନସ ପ୍ରଧାନଙ୍କୁ କୋର୍ଟ ଚାଲାଣ କରିଥିବା ଶୀତଳପାଣି ଫରେଷ୍ଟର ଲକ୍ଷ୍ମୀନାରାୟଣ ପଣ୍ଡା ସୂଚନା ଦେଇଛନ୍ତି । ଅନ୍ୟ ଜଣେ ସହଯୋଗୀ ଫେରାର ଥିବା ସେ ସୂଚନା ଦେଇଛନ୍ତି।
Comments are closed.