ମୁମ୍ବଇ : ଶୁକ୍ରବାରଠାରୁ ଅଷ୍ଟ୍ରେଲିଆ ବିପକ୍ଷ ଦିନିକିଆ ଶୃଙ୍ଖଳା ଖେଳିବାକୁ ଯାଉଛି ଘରୋଇ ଭାରତ। ଏହି ଶୃଙ୍ଖଳାରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ରିକି ପଣ୍ଟିଂଙ୍କ କୀର୍ତ୍ତିମାନ ଦ୍ବାରରେ ପହଞ୍ଚିଛନ୍ତି ଭାରତୀୟ ବ୍ୟାଟିଂ ମହାରଥୀ ବିରାଟ କୋହଲି। ଆଉ ୫୯ ରନ୍ କଲେ ଘରୋଇମାଟିରେ ସର୍ବାଧିକ ଦିନିକିଆ ସ୍କୋର୍ କରିବାରେ ପଣ୍ଟିଂଙ୍କ କୀର୍ତ୍ତିମାନକୁ କୋହଲି ଅତିକ୍ରମ କରିବେ। ରିକି ପଣ୍ଟିଂ ଘରୋଇମାଟିରେ ୧୫୩ଟି ଦିନିକିଆ ମ୍ୟାଚ୍ ଖେଳି ୫୪୦୬ ରନ୍ କରିଛନ୍ତି। ଅନ୍ୟପକ୍ଷରେ ବିରାଟ କୋହଲି ଭାରତରେ ୧୦୭ଟି ଦିନିକିଆ ଖେଳି ୫୩୪୮ ରନ୍ କରିଛନ୍ତି। ସଚିନ ତେନ୍ଦୁଲକର ଭାରତରେ ୧୬୪ଟି ଦିନିକିଆ ମ୍ୟାଚ୍ ଖେଳି ସର୍ବାଧିକ ୬୯୭୬ ରନ୍ କରିଛନ୍ତି। ପୁଣି ଏହି ଶୃଙ୍ଖଳାରେ ଆଉ ୧୯୧ ରନ୍ କଲେ କୋହଲି ଦିନିକିଆରେ ୫ମ ବ୍ୟାଟ୍ସମ୍ୟାନ ଭାବେ ୧୩୦୦୦ ରନ୍ ପୂରଣ କରିବେ। ପୂର୍ବରୁ ସଚିନ, କୁମାର ସାଙ୍ଗାକାରା, ପଣ୍ଟିଂ ଓ ସନତ ଜୟସୂରିୟା ଏହି କୃତିତ୍ବ ହାସଲ କରିଛନ୍ତି। ୪୬ଟି ଦିନିକିଆ ଶତକ ହାସଲ କରିଥିବା କୋହଲି ଏହି ଶୃଙ୍ଖଳାରେ ସଚିନ ତେନ୍ଦୁଲକରଙ୍କ ବିଶ୍ବ କୀର୍ତ୍ତିମାନ ୪୯ଟି ଦିନିକିଆ ଶତକ ସଂଖ୍ୟାର ନିକଟବର୍ତ୍ତୀ ହେବାର ପ୍ରୟାସ କରିବେ।
Comments are closed.