ଆଡିଲେଡ୍ : ଭ୍ରମଣକାରୀ ଭାରତ ଓ ଘରୋଇ ଅଷ୍ଟ୍ରେଲିଆ ମଧ୍ୟରେ ଖେଳାଯିବାକୁ ଥିବା ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଆଉ ଏକ ନୂଆ କୀର୍ତ୍ତିମାନ ସ୍ଥାପନ ଲକ୍ଷ୍ୟରେ ରହିଛନ୍ତି ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି।
ଅଷ୍ଟ୍ରେଲିଆ ମାଟିରେ ଘରୋଇ ଦଳ ବିପକ୍ଷରେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ୨୦ଟି ଟେଷ୍ଟ ମ୍ୟାଚ୍ ଖେଳି ଭାରତ ପକ୍ଷରୁ ସର୍ବାଧିକ ୬ଟି ଶତକ ହାସଲ କରିଥିବା ବେଳେ କୋହଲି ଏପର୍ଯ୍ୟନ୍ତ ୮ଟି ଟେଷ୍ଟ ମ୍ୟାଚ୍ ଖେଳି ୫ଟି ଶତକ ହାସଲ କରିଛନ୍ତି। ଦୁଇ ଦେଶ ମଧ୍ୟରେ ଖେଳାଯିବାକୁ ଥିବା ଟେଷ୍ଟ ସିରିଜ୍ରେ କୋହଲି ଯଦି ଆଉ ୨ଟି ଶତକ ହାସଲ କରନ୍ତି ତେବେ ସେ ତେନ୍ଦୁଲକରଙ୍କ ରେକର୍ଡ ଭାଙ୍ଗି ଦେବେ। ତେନ୍ଦୁଲକର ଅଷ୍ଟ୍ରେଲିଆ ବିପକ୍ଷରେ ୨୦ଟି ଟେଷ୍ଟ ମ୍ୟାଚ୍ ଖେଳି ୧୮୦୯ ରନ୍ ସଂଗ୍ରହ କରିଥିବା ବେଳେ କୋହଲି ୮ଟି ଟେଷ୍ଟ ମ୍ୟାଚ୍ ଖେଳି ୯୯୨ ରନ୍ ସଂଗ୍ରହ କରିଛନ୍ତି। ସେହିପରି ସୁନୀଲ ଗାଭାସ୍କର ଅଷ୍ଟ୍ରେଲିଆ ମାଟିରେ ୧୧ଟି ଟେଷ୍ଟ ଖେଳି ୫ଟି, ଭିଭିଏସ୍ ଲକ୍ଷ୍ମଣ ୧୫ଟି ଟେଷ୍ଟ ଖେଳି ୪ଟି ଓ ମହିନ୍ଦର ଅମରନାଥ ୮ଟି ଟେଷ୍ଟ ଖେଳି ୨ଟି ଶତକ ହାସଲ କରିଛନ୍ତି।
