ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୂର୍ଯ୍ୟୋଦୟ ଯୋଜନାର ଘୋଷଣା କରିଛନ୍ତି । ଏହି ଯୋଜନା ଫଳରେ ଦେଶରେ ଗରିବ ଏବଂ ମଧ୍ୟମ ବର୍ଗ ବିଜୁଳି ବିଲରୁ ଆଶ୍ବସ୍ତି ପାଇପାରିବେ । ନିଜ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏନେଇ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦେଶରେ ଏକ କୋଟି ଘରେ ସୋଲାର ପ୍ୟାନେଲ ଲଗାଇବା ଲକ୍ଷ୍ୟ ସହିତ ‘ପ୍ରଧାମନ୍ତ୍ରୀ ସୂର୍ଯ୍ୟୋଦୟ ଯୋଜନା’ ଆରମ୍ଭ କରିବା ପାଇଁ ଯୋଜନା ରହିଥିବା ଏଥିରେ ଉଲ୍ଲେଖ ରହିଛି ।
ଭାରତର ନିମ୍ନ ତଥା ମଧ୍ୟମ ବର୍ଗର ନାଗରିକଙ୍କ ଘରେ ସୋଲାର ପ୍ୟାନେଲ ଲଗାଇବା ସହ ସେମାନଙ୍କୁ ବିଜୁଳି ବିଲରୁ ଆଶ୍ବସ୍ତି ଦେବା ଏହାର ମୂଳ ଲକ୍ଷ୍ୟ । ଏହା ଫଳରେ ସେମାନଙ୍କୁ ଆର୍ଥିକ ରୂପେ ଆଶ୍ବସ୍ତି ମିଳିପାରିବ । ଏହା ଫଳରେ ଦେଶ ଆତ୍ମନିର୍ଭର ଭାରତ ଗଠନ ଦିଗରେ ଆଉ ଏକ ପାଦ ଆଗକୁ ଅଗ୍ରସର ହୋଇପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହି ଯୋଜନା ପାଇଁ ଖୁବ୍ ଶୀଘ୍ର ଏକ ଓ୍ବେବସାଇଟ୍ ମଧ୍ୟ ଲଞ୍ଚ୍ କରାଯିବ । ଏହା ମାଧ୍ୟମରେ ଇଚ୍ଛୁକ ନାଗରିକ ଆବେଦନ କରିପାରିବେ । ପ୍ରଧାନମନ୍ତ୍ରୀ ଅଧିକାରୀଙ୍କୁ ମଧ୍ୟ ଜାତୀୟ ସ୍ତରରେ ଅଭିଯାନ ଚଳାଇବା ପାଇଁ ଅପିଲ୍ କରିଛନ୍ତି । ଯାହା ଫଳରେ ଅଧିକରୁ ଅଧିକ ନାଗରିକ ରୁଫଟପ୍ ସୋଲାର ପ୍ୟାନେଲ ଆପଣାଇବା ପାଇଁ ପ୍ରସ୍ତୁତ ହେବେ ।
ରୁଫଟପ୍ ସୋଲାର ପ୍ୟାନେଲ ଏକ ଫଟୋଭୋଲ୍ଟାଇକ ପ୍ୟାନେଲ୍ ଯାହାକୁ କୌଣସି ବି ଘର ଛାତ ଉପରେ ସହଜରେ ସ୍ଥାପନ କରିହେବ । ସୂର୍ଯ୍ୟରୁ ଶକ୍ତି ଗ୍ରହଣ କରୁଥିବା ଏହି ପ୍ୟାନେଲ୍ ମୁଖ୍ୟ ବିଜୁଳି ସପ୍ଲାଇ ଲାଇନ୍ ସହ ଯୋଡି ଦିଆଯିବ ଏବଂ ଗ୍ରିଡରୁ ଆସୁଥିବା ବିଜୁଳି ଖର୍ଚ୍ଚ କମାଇ ଦେବ । ଯାହା ଫଳରେ ବିଜୁଳି ବିଲ୍ ମଧ୍ୟ କମ୍ ଆସିବ । ଏହି ସୋଲାର ପ୍ୟାନେଲ୍ ସ୍ଥାପନ କରିବା ପାଇଁ ମାତ୍ର ଥରେ ଖର୍ଚ୍ଚ କରିବାକୁ ହେବ । ଏହାର ରକ୍ଷଣାବେକ୍ଷଣ ଖର୍ଚ୍ଚ ବିଲକୁଲ୍ ନାହିଁ କହିଲେ ଚଳେ ।
Comments are closed.