କେନ୍ଦୁଝରଗଡ : କେନ୍ଦୁଝର ସହର ଉପକଣ୍ଡ ବୋଦାପଳସାସ୍ଥିତ ଚନ୍ଦ୍ରଶେଖର ମହାଦେବ ମନ୍ଦିର ମୁଖ୍ୟ ଦ୍ୱାର ତାଲା ଭାଙ୍ଗି ମନ୍ଦିର ପରିସରରେ ଥିବା ହୁଣ୍ଡିକୁ ଭାଙ୍ଗି ଭକ୍ତଙ୍କ ଦାନ ଅର୍ଥ ଲକ୍ଷାଧିକ ଟଙ୍କା ଲୁଟି ନେଇଥିବା ଜଣାପଡିଛି। ସବୁଦିନ ପରି ରବିବାର ସନ୍ଧ୍ୟାରେ ସାନ୍ଧ୍ୟ ଆଳତୀ ପରେ ମନ୍ଦିର ବନ୍ଦ କରି ପୂଜକ ଚାଲି ଯାଇଥିଲେ। ଶ୍ରାବଣ ସୋମବାର ପରିପ୍ରେକ୍ଷୀରେ ମନ୍ଦିରରେ ଜଳାଭିଷେକ ପାଇଁ ଭକ୍ତଙ୍କୁ ମାଗଣାରେ ପ୍ରସାଦ ବଣ୍ଟନ ନିମନ୍ତେ ରାତି ପ୍ରାୟ ୯ଟାରେ ରୋଷେୟା ମନ୍ଦିରରେ ପହଞ୍ଚିବା ବେଳକୁ ମନ୍ଦିର ବେଢ଼ା ଲାଇଟ୍ ଜଳୁଥିବା ବେଳେ ମନ୍ଦିର ପରିସର ଲାଇଟ୍ ବନ୍ଦ ଥିବା ଦେଖିଥିଲେ ହେଁ କୌଣସି କାରଣରୁ ଲାଇଟ୍ ଜଳୁନଥିବା ଆଶଙ୍କା ପ୍ରକଟ କରିଥିଲେ।
ସୋମବାର ସକାଳୁ ମନ୍ଦିରର କୋଠ ତହସିଲଦାର ପ୍ରଦୀପ କୁମାର ପଣ୍ଡା ମନ୍ଦିରରେ ପହଞ୍ଚିବା ବେଳକୁ ମନ୍ଦିର ମୁଖ୍ୟଫାଟକ ତାଲା ଭାଙ୍ଗି କେହି ଦୁର୍ବୃତ୍ତ ମନ୍ଦିର ପରିସରରେ ଥିବା ଦାନ ହୁଣ୍ଡି ଭାଙ୍ଗି ଭକ୍ତଙ୍କ ଲକ୍ଷାଧିକ ଟଙ୍କା ଦାନ ଅର୍ଥକୁ ଲୁଟି ନେଇଥିବା ଜାଣିବାକୁ ପାଇଥିଲେ। ଏ ସମ୍ପର୍କରେ ସଦର ଥାନା ପୁଲିସ ନିକଟରେ କୋଠ ତହସିଲଦାର ଶ୍ରୀ ପଣ୍ଡା ଅଭିଯୋଗ କରିବା ପରେ ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ତେବେ ଏହି ଘଟଣାରେ ପୁଲିସ ଦୁର୍ବୃତ୍ତଙ୍କୁ ଧରିବାରେ ସଫଳ ହୋଇନଥିବା ଜଣାପଡିଛି।
