କେନ୍ଦୁଝରଗଡ଼: ମହାରାଜା ଶ୍ରୀରାମ ଚନ୍ଦ୍ର ଭଞ୍ଜଦେଓ ବିଶ୍ୱବିଦ୍ୟାଳୟ ବାରିପଦାର ୧୨ତମ ସମାବର୍ତ୍ତନ ଉତ୍ସବରେ ପ୍ରଭାସ ମଞ୍ଜରୀ ଆଇନ ମହାବିଦ୍ୟାଳୟ କେନ୍ଦୁଝରର ଛାତ୍ର ଅଂଶୁମାନ ଚକ୍ରବର୍ତ୍ତୀ ୨୦୨୨ର ଶ୍ରେଷ୍ଠ ଆଇନ ସ୍ନାତ୍ତକ ଭାବେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଠାରୁ ସ୍ୱର୍ଣ୍ଣ ପଦକ ଗ୍ରହଣ କରିଛନ୍ତି। ବିଶ୍ୱବିଦ୍ୟାଳୟ ପରିସରରେ ଶନିବାର ଆୟୋଜିତ ସମାବର୍ତ୍ତନ ଉତ୍ସବରେ ରାଜ୍ୟପାଳ ତଥା କୁଳାଧିପତି ପ୍ରଫେସର ଗଣେଶୀ ଲାଲ, ଜଙ୍ଗଲ ପରିବେଶ ଓ ପଞ୍ଚାୟତରାଜ ମନ୍ତ୍ରୀ ପ୍ରଦୀପ କୁମାର ଅମାତ, କୁଳପତି ସନ୍ତୋଷ କୁମାର ତ୍ରିପାଠୀଙ୍କ ଉପସ୍ଥିତିରେ ରାଷ୍ଟ୍ରପତି ଶ୍ରୀମତୀ ମୁର୍ମୁ ଅଂଶୁମାନଙ୍କୁ ସ୍ୱର୍ଣ୍ଣ ପଦକ ପ୍ରଦାନ କରିଥିଲେ। ପ୍ରଭାସ ମଞ୍ଜରୀ ଆଇନ ମହାବିଦ୍ୟାଳୟ କେନ୍ଦୁଝରର ଅଧ୍ୟକ୍ଷ ଧନେଶ୍ୱର ଦାସ, ସମସ୍ତ ଅଧ୍ୟାପକ ଅଧ୍ୟାପିକା, ସହପାଠୀ, ପରିବାରବର୍ଗ ଏବଂ ଶୁଭେଛୁଙ୍କୁ ନିଜର ଏହି ଶ୍ରେୟ ପ୍ରଦାନ କରିଛନ୍ତି ଅଂଶୁମାନ।
ସୂଚନାଯୋଗ୍ୟ ଯେ ଅଂଶୁମାନ ଜଣେ ଯୁବ ସମାଜସେବୀ ଭାବେ ନିଜର ଉତ୍କର୍ଷତା ପାଇଁ ଜିଲା ଓ ରାଜ୍ୟ ବାହାରର ବିଭିନ୍ନ ଅନୁଷ୍ଠାନ ପକ୍ଷରୁ ବହୁବାର ସମ୍ବର୍ଦ୍ଧିତ ହୋଇଥିବା ବେଳେ ଆଜି ରାଷ୍ଟ୍ରପତିଙ୍କ ଠାରୁ ସ୍ୱର୍ଣ୍ଣପଦକ ଗ୍ରହଣ କରି ଜିଲା ପାଇଁ ଗୌରବ ଆଣି ଦେଇଥିବାରୁ ଅଂଶୁମାନଙ୍କୁ ଶୁଭେଛା ସୁଅ ଛୁଟିଛି।
Comments are closed.