କେନ୍ଦୁଝରଗଡ଼: ନାବାଳିକା ଦୁଷ୍କର୍ମକାରୀକୁ ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝର ବୁଧବାର ଦୋଷୀ ସାବ୍ୟସ୍ତ କରି ୧୦ବର୍ଷ ସଶ୍ରମ ଜେଲ୍ ଦଣ୍ଡାଦେଶ କରିଛନ୍ତି। ଭିଣୋଇ ମୃତ୍ୟୁ ପରେ ଭଉଣୀ ଘରେ ୧୫ବର୍ଷର ନାବାଳିକା ରହି ଆସୁଥିବା ବେଳେ ଘଟଗାଁ ଥାନା ଧୋବାପିଟଣା ଗ୍ରାମର ସମ୍ପର୍କୀୟ ଭାଇ ତଥା ଟ୍ରାକ୍ଟର ଚାଳକ ପିଣ୍ଟୁ ମୁଣ୍ଡା ସମ୍ପୃକ୍ତ ନାବାଳିକା ସହ ଜୋରଜବରଦସ୍ତ ଶାରିରୀକ ସମ୍ପର୍କ ସ୍ଥାପନ ସହ ଏ ସମ୍ପର୍କରେ କାହାରି ଆଗରେ ପ୍ରକାଶ କଲେ ଜୀବନରୁ ମାରି ଦେବାକୁ ହତ୍ୟା ଧମକ ଦେଇ ଆସୁଥିଲା।
କିଛିଦିନ ପରେ ନାବାଳିକାଜଣକ ତା’ର ଶାରିରୀକ ଗଠନରେ ଅସ୍ୱାଭାବିକ ବୃଦ୍ଧି ଦେଖି ବଡ ଭଉଣୀ ଡାକ୍ତରୀ ପରୀକ୍ଷା କରିବା ପରେ ଗର୍ଭବତୀ ଥିବା ଜଣାପଡିବା ପରେ ନାବାଳିକାଜଣକୁ ପିଣ୍ଟୁ ଧମକ ଦେଇ ବାରମ୍ବାର ଦୁଷ୍କର୍ମ କରି ଆସୁଥିବା କହିଥିଲା। ଏ ସମ୍ପର୍କରେ ବିଶେଷସୂତ୍ରରୁ ଖବର ପାଇ ଶିଶୁ ମଙ୍ଗଳ ସମିତିର କର୍ମକର୍ତ୍ତା ନାବାଳିକା ଜଣକୁ ଉଦ୍ଧାର କରିବା ସହ ୧୯ ନଭେମ୍ବର ୨୦୧୮ରେ ସ୍ଥାନୀୟ ଘଟଗାଁ ଥାନାରେ ଅଭିଯୋଗ କରିବା ପରେ ପୁଲିସ ଅଭିଯୁକ୍ତ ପିଣ୍ଟୁକୁ ୨୦ ନଭେମ୍ବରରେ ଗିରଫ କରି କୋର୍ଟ ଚାଲାଣ କରିଥିଲା।
ଏହି ମାମଲାରେ ମୋଟ ୨୦ଜଣ ସାକ୍ଷୀଙ୍କ ବୟାନକୁ ଭିତ୍ତିକରି ଫାଷ୍ଟ ଟ୍ରାକ୍ କୋର୍ଟ କେନ୍ଦୁଝରର ବିଚାରପତି ବିଜୟ କୁମାର ମିଶ୍ର ବୁଧବାର ଚୂଡାନ୍ତ ଶୁଣାଣୀ କରି ଅଭିଯୁକ୍ତ ପିଣ୍ଟୁକୁ ଦୋଷୀ ସାବ୍ୟସ୍ତ କରି ୧୦ବର୍ଷ ସଶ୍ରମ ଜେଲ୍ ଓ ୧୦ହଜାର ଟଙ୍କା ଜୋରିମାନା ଏବଂ ଜୋରିମାନା ଅନାଦେୟ ଅଧିକ ୬ମାସ ସଶ୍ରମ କାରାଦଣ୍ଡାଦେଶ କରିଛନ୍ତି। ଏଥିସହ ପୀଡିତାକୁ ୮ଲକ୍ଷ ଟଙ୍କା ଅନୁକମ୍ପାମୂଳକ ସହାୟତା ରାଶି ପ୍ରଦାନ ନିମନ୍ତେ ସୁପାରିଶ କରିଛନ୍ତି। ପୀଡିତାଙ୍କ ପକ୍ଷରୁ ସ୍ୱତନ୍ତ୍ର ପି.ପି.ଜ୍ଞାନେନ୍ଦ୍ରନାଥ ଜେନା ମକଦ୍ଦମା ପରିଚାଳନା କରୁଥିଲେ।
