କେନ୍ଦୁଝରଗଡ଼ : ପ୍ରଥମରୁ ଦଶମଶ୍ରେଣୀ ଛାତ୍ରଛାତ୍ରୀମାନଙ୍କ ମଧ୍ୟାହ୍ନଭୋଜନ କାର୍ଯ୍ୟକ୍ରମକୁ ସଫଳ ରୂପାୟନ ପାଇଁ କେନ୍ଦ୍ର ଓ ରାଜ୍ୟ ସରକାର ପାଚିକା ସହାୟିକା ମାନଙ୍କୁ ୨୦ବର୍ଷରୁ ଉଦ୍ଧ୍ୱର୍ ସମୟଧରି ନିୟୋଜିତ କରି ମାସିକ ୧୪୦୦ଟଙ୍କା ଓ ବର୍ଷକୁ ୧୦ମାସର ଭତ୍ତା ପ୍ରଦାନ କରୁଛନ୍ତି।
ନିକଟରେ ରାଜ୍ୟ ସରକାର ପାଚିକାମାନଙ୍କୁ ମାସିକ ୬୦୦ଟଙ୍କା ଭତ୍ତା ବୃଦ୍ଧି କରି ଆମ୍ଭମାନଙ୍କ ଦାବିକୁ ପୁରଣ ନକରି ଉପହାସ କରିଥିବା ପାଚିକା ସହାୟିକା ସଂଘ କେନ୍ଦୁଝର ଜିଲା କାର୍ଯ୍ୟକାରୀ ସଭାପତି ଇନ୍ଦ୍ରମଣି ରାଉତ କହିଛନ୍ତି। ଜିଲାର ବିଭିନ୍ନ ବିଦ୍ୟାଳୟରେ କାର୍ଯ୍ୟରତ ସହସ୍ରାଧିକ ପାଚିକା ସହାୟିକା ସୋମବାର ସ୍ଥାନୀୟ କାଳୀପଡିଆରୁ ଏକ ଶୋଭାଯାତ୍ରାରେ ଆସି ୭ଦଫା ଦାବି ପୁରଣ ନେଇ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ।
ମଧ୍ୟାହ୍ନଭୋଜନକର୍ମୀ ପାଚିକା ସହାୟିକା ମାନଙ୍କୁ ଶ୍ରମିକ ମାନ୍ୟତା ପ୍ରଦାନ, ମଧ୍ୟାହ୍ନଭୋଜନକର୍ମୀ ପାଚିକା ସହାୟିକାମାନଙ୍କୁ ସର୍ବନିମ୍ନ ମଜୁରୀ ପ୍ରଦାନ, କେନ୍ଦ୍ର ସରକାର ୨୦୧୭ରୁ ବୃଦ୍ଧି କରିଥିବା ମାସିକ ୬୦୦ଟଙ୍କା ଏବଂ ୨୦୨୩ରୁ ମାସିକ ୯୦୦ଟଙ୍କା ବୃଦ୍ଧିକୁ ତୁରନ୍ତ ପ୍ରଦାନ, ବର୍ଷକୁ ୧୦ମାସ ପରିବର୍ତ୍ତେ ୧୨ମାସର ଦରମା ପ୍ରଦାନ, ବର୍ଷକୁ ୨ଖଣ୍ଡ ଶାଢ଼ୀର ମୂଲ୍ୟ ୧୦୦୦ଟଙ୍କା, ଅବସର ବୟସ ୬୦ପରିବର୍ତ୍ତେ ୬୨ବର୍ଷକୁ ବୃଦ୍ଧି ଏବଂ ସୁରକ୍ଷା ବୀମା ଓ ଅବସରକାଳୀନ ପେନସନ ଯୋଜନା କାର୍ଯ୍ୟକାରୀ କରାଯାଉ ବୋଲି କେନ୍ଦୁଝର ଜିଲା ସିଟୁ ସଭାପତି ପୂର୍ଣ୍ଣଚନ୍ଦ୍ର ରାଉତ ଦାବି କରିଛନ୍ତି।
ଉପରୋକ୍ତ ମର୍ମରେ କାର୍ଯ୍ୟକାରୀ ସଭାପତି ଶ୍ରୀ ରାଉତ ଓ ସିଟୁ ନେତା ପୂର୍ଣ୍ଣଚନ୍ଦ୍ର ରାଉତଙ୍କ ସମେତ ତୁଳସୀ ମହାନ୍ତ, ଗୋଦାବରୀ ଦେହୁରୀ, ମାଖନ ଲୋହାର, ରଞ୍ଜିତା ମହାକୁଡ, ଦ୍ରୌପଦୀ ସାହୁ, କନକ ଦେହୁରୀ, ଦୀପାଞ୍ଜଳି ପଣ୍ଡା, ସନ୍ଧ୍ୟାରାଣୀ ବେହେରା ପ୍ରମୁଖ ଏକ ପ୍ରତିନିଧିମଣ୍ଡଳୀ ଜିଲାପାଳଙ୍କୁ ଭେଟି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିଛନ୍ତି।
Comments are closed.