କେନ୍ଦୁଝରଗଡ : ବଣପାହାଡଘେରା କେନ୍ଦୁଝର ଜିଲାରେ ମନୁଷ୍ୟ-ବନ୍ୟପ୍ରାଣୀ ଲଢ଼େଇ ଦିନକୁ ଦିନ ବେଶ୍ ବୃଦ୍ଧି ପାଇବାରେ ଲାଗିଥିବା ବେଳେ ଅତ୍ୟାଧୁନିକ ଯାନ ‘ରକ୍ଷକ’ ଏହାକୁ ହ୍ରାସ ଦିଗରେ ବିଶେଷ ସହାୟକ ହେବ ବୋଲି କେନ୍ଦୁଝର ଡିଏଫଓ ଧନରାଜ ଏଚ.ଡି କହିଛନ୍ତି। ଶନିବାର ସନ୍ଧ୍ୟାରେ ବନଖଣ୍ଡ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ଡିଏଫଓ ଶ୍ରୀ ଧନରାଜ ଏହା କହିବା ସହ ବନ୍ୟପ୍ରାଣୀଙ୍କ ଆପାତକାଳୀନ ସହାୟତା ନିମନ୍ତେ ଏହି ଯାନ ଅଧିକ ଉପଯୋଗୀ ହେବ ବୋଲି କହିଛନ୍ତି। କେବଳ ବନ୍ୟପ୍ରାଣୀ ସୁରକ୍ଷାରେ ନୁହେଁ, ଏଥିସହ ଏହି ଅତ୍ୟାଧୁନିକ ଯାନ ବନ୍ୟା ଓ ବାତ୍ୟା ଆଦି ପ୍ରାକୃତିକ ବିପର୍ଯ୍ୟୟ ଏବଂ ଦୁର୍ଘଟଣାଜନିତ କାର୍ଯ୍ୟରେ ମଧ୍ୟ ନିୟୋଜନ କରାଯାଇ ଜନସାଧାରଣଙ୍କୁ ସହାୟତା ପ୍ରଦାନ ସହ ସାଧାରଣରେ ସଚେତନତା ସୃଷ୍ଟିରେ ସହାୟକ ହୋଇପାରିବ ବୋଲି ଡିଏପଓ ଏହା କହନ୍ତି। ଏହି ରକ୍ଷକ ଯାନ ପରିଚାଳନା ପାଇଁ ୩ ଜଣ ଫରେଷ୍ଟର ଓ ୩ଜଣ ଫରେଷ୍ଟ ଗାର୍ଡଙ୍କୁ ନେଇ ଗଠିତ ରାପିଡ ରେସପନ୍ସ ଟିମ୍ ଭୁବନେଶ୍ୱର ଚନ୍ଦକା ଠାରେ ତାଲିମ ଶେଷ କରିଥିବା ଡିଏପଓ ସୂଚନା ପ୍ରଦାନ କରିଛନ୍ତି। ସହକାରୀ ବନସଂରକ୍ଷକ ଅଶୋକ କୁମାର ଦାସ ଏହି ସାମ୍ବାଦିକ ସମ୍ମିଳନୀରେ ଉପସ୍ଥିତ ଥିଲେ।
Comments are closed.