କେନ୍ଦୁଝରଗଡ଼: ବିଘ୍ନ ବିନାଶକ ପ୍ରଭୁ ଶ୍ରୀ ଗଣେଶଙ୍କ ପୂଜାତ୍ସୋବ ମଙ୍ଗଳବାର ଠାରୁ କେନ୍ଦୁଝର ଜିଲାରେ ଧୂମଧାମରେ ଆରମ୍ଭ ହୋଇଛି। ଏଥିପାଇଁ ବିଶେଷକରି କେନ୍ଦୁଝର ସହର ବେଶ୍ ଚଳଚଞ୍ଚଳ ହୋଇପଡିଛି। ଗତ କିଛିବର୍ଷ ଧରି ଗଣେଶ ପୂଜା କେନ୍ଦୁଝର ସହରରେ ଏକ ପ୍ରମୁଖ ପର୍ବ ଭାବେ ପାଳିତ ହୋଇ ଆସୁଥିବା ବେଳେ ସହରର ବିଭିନ୍ନ ଶିକ୍ଷାନୁଷ୍ଠାନ ଏବଂ ଘରୋଇ ଅନୁଷ୍ଠାନ ମାନଙ୍କରେ ଏହି ପୂଜାତ୍ସୋବ ବେଶ୍ ଜାକଜମକରେ ଆରମ୍ଭ ହୋଇଛି। କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କ, ଡିଏଫ୍ଓ କାର୍ଯ୍ୟାଳୟ, ଡ଼େଲି ମାର୍କେଟ, ଶ୍ରୀଗଣେଶ କ୍ଲବ ମାଧପୁର, ବଣିଆପାଟ, ଫରେଷ୍ଟ କଲୋନୀ, ମାଇନିଂରୋଡ, କାଶୀପୁର, ମଣ୍ଡୁଆ, ଆଟୋପୁର, ପୁରୁଣାବଜାର, ଜିଲା ଯୁବ କଂଗ୍ରେସ କାର୍ଯ୍ୟାଳୟ ଆଦି ସ୍ଥାନ ମାନଙ୍କରେ ସୁଦୃଶ୍ୟ ତୋରଣ ସାଙ୍ଗକୁ ପ୍ରତିମୂର୍ତ୍ତି ଏବଂ ରଙ୍ଗୀନ ଆଲୋକ ସାଜସଜ୍ଜା ସହରକୁ ବେଶ୍ ଚଳଚଞ୍ଚଳ କରିଦେଇଛି।
ବିଶେଷକରି ବସ୍ଷ୍ଟାଣ୍ଡ ଠାରେ ରେକ୍ସ କ୍ଲବ ପକ୍ଷରୁ ଆୟୋଜିତ ସୁସଜ୍ଜିତ ତୋରଣ ସାଙ୍ଗକୁ ପ୍ରଭୁ ଗଣେଶଙ୍କ ସୁଦୃଶ୍ୟ ପ୍ରତିମୂର୍ତ୍ତି ଏବଂ ଜିଲାପାଳଙ୍କ ଛକଠାରୁ ଲାବଣ୍ୟଛକ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ବ ଆଲୋକମାଳରେ ଝଲସୁଥିବା ବେଳେ ହାୱଡା ବ୍ରିଜ୍ର ବୈଦ୍ୟୁତିକ ତୋରଣ ଦର୍ଶକଙ୍କୁ ବେଶ୍ ଆକୃଷ୍ଟ କରିଛି। ସହରର ସମସ୍ତ ସରକାରୀ ଓ ଘରୋଇ ଶିକ୍ଷାନୁଷ୍ଠାନ ମାନଙ୍କରେ ମଧ୍ୟ ପୂଜାତ୍ସୋବ ବେଶ୍ ଆଡମ୍ବର ସହ ପାଳିତ ହେଉଛି। ଏତଦ୍ବ୍ୟତୀତ ସହର ଉପକଣ୍ଠରେ ଥିବା ଗ୍ରାମାଞ୍ଚଳ ଶିକ୍ଷାନୁଷ୍ଠାନ ଏବଂ ବିଭିନ୍ନ ସଂଘ ପକ୍ଷରୁ ଏହି ପୂଜା ଚଳିତବର୍ଷ ବେଶ୍ ଧୂମ୍ଧାମରେ ପାଳିତ ହୋଇଆସୁଛି । ଏହି ପୂଜା କେନ୍ଦୁଝର ସହରରେ ୭ଦିନବ୍ୟାପୀ ମହାଡ଼ମ୍ବରରେ ପାଳନ ହେବାକୁ ଥିବାବେଳେ ବିଭିନ୍ନ ପୂଜାମଣ୍ଡପ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଛି। ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ପୁଲିସ ପ୍ରଶାସନ ପକ୍ଷରୁ ପ୍ରମୁଖ ପୂଜାମଣ୍ଡପ ନିକଟରେ ଫୋର୍ସ ମୁତୟନ କରାଯାଇ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି।
