ସମାଜ ଡିଜିଟାଲ ଡେସ୍କ: କାଉଡ଼ି ଯାତ୍ରା ସମୟରେ ହିଂସାକାଣ୍ଡ ଘଟିଛି। ଏକ ସାମାନ୍ୟ ଘଟଣାକୁ କେନ୍ଦ୍ର କରି ଅନେକ କାଉଡ଼ିଆ ଗାଡ଼ି ଭଙ୍ଗାରୁଜା କରିଛନ୍ତି। ହରିଦ୍ଵାରର ମଙ୍ଗଲୌର ଅନ୍ତର୍ଗତ ଲିବରହେଡି ଅଞ୍ଚଳରେ ବୁଧବାର ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। କିଛି କାଉଡିଆ ପୁଲିସ ଉପସ୍ଥିତିରେ ଏକ ଇ-ରିକ୍ସାକୁ ଭଙ୍ଗାରୁଜା କରିବା ସହିତ ତାହାର ଡ୍ରାଇଭରଙ୍କୁ ନିସ୍ତୁକ ମାଡ଼ ମାରିଛନ୍ତି।
ସୂଚନା ଅନୁସାରେ, ଲିବରହେଡି ଅଞ୍ଚଳରେ କିଛି କାଉଡିଆ ଯାଉଥିବାବେଳେ ଏକ ରିକ୍ସା ଜଣେ ଯାତ୍ରୀଙ୍କ ଦେହରେ ଘସି ହୋଇଯାଇଥିଲା। ଭିଡ଼ ଥିବାରୁ ଭୁଲବଶତଃ ଏପରି ହୋଇଥିଲା। ଏଥିରେ ଉକ୍ତ କାଉଡିଆ ଆହତ ହୋଇ ନ ଥିଲେ କି ତାଙ୍କର କୌଣସି କ୍ଷତି ମଧ୍ୟ ହୋଇ ନ ଥିଲା। ହେଲେ ଏହି ଘଟଣାକୁ ନେଇ ଅନ୍ୟ ଯାତ୍ରୀମାନେ ଅତ୍ୟନ୍ତ ହିଂସ୍ର ହୋଇପଡ଼ିଥିଲେ। ୮/୧୦ ଜଣ ଯାତ୍ର ଗାଡ଼ିରୁ ଡ୍ରାଇଭରଙ୍କୁ ଘୋଷାଡି ଆଣି ମାଡ଼ ମାରିବା ସହିତ ତାଙ୍କ ଗାଡ଼ିକୁ ଭାଙ୍ଗି ଦେଇଥିଲେ। ଖବର ପାଇ ପୁଲିସ ସେଠାରେ ପହଞ୍ଚିବା ପରେ କାଉଡିଆମାନଙ୍କୁ ଅଟକାଇବାକୁ ଚେଷ୍ଟା କରିଥିଲା। କିନ୍ତୁ ପୁଲିସ ଉପସ୍ଥିତିରେ ବି ସେମାନେ ଗାଡ଼ି ଭଙ୍ଗାରୁଜା କରିଥିଲେ। ଏହାର ଏକ ଭିଡିଓ ସାମାଜିକ ଗଣମାଧ୍ୟମରେ ପ୍ରଘଟ ହୋଇଥିବାବେଳେ ଭକ୍ତିପୂର୍ବକ ଏହି ଯାତ୍ରାରେ କାଉଡିଆମାନଙ୍କ ଏପରି ହିଂସ୍ର ଆଚରଣଙ୍କୁ ସାଧାରଣରେ ନିନ୍ଦା କରାଯାଇଛି।
