ଚିତ୍ରଦୂର୍ଗ: କର୍ଣ୍ଣାଟକର ଚିତ୍ରଦୂର୍ଗରେ ଜଣେ ବିଜେପି ସାଂସଦଙ୍କୁ ନିଜ ନିର୍ବାଚନ ମଣ୍ଡଳୀରେ ଥିବା ଏକ ଗ୍ରାମକୁ ପ୍ରବେଶ କରିବାକୁ ଦିଆଯାଇନାହିଁ । ସଂସଦ ଏ.ନାରାୟଣସ୍ବାମୀ ଦଳିତ ଜାତିର ହୋଇଥିବାରୁ ତାଙ୍କ ପ୍ରବେଶ ଉପରେ ଗ୍ରାମବସୀମାନେ ପ୍ରତିବନ୍ଧକ ଲଗାଇଛନ୍ତି । ଏ.ନାରାୟଣସ୍ଵାମୀ କିଛି ସରକାରୀ ଅଧିକାରୀଙ୍କ ସହ ନିଜ ନିର୍ବାଚନ ମଣ୍ଡଳୀ ପରିଦର୍ଶନ କରୁଥିବା ସମୟରେ ଏହି ଅଘଟଣା ଘଟିଥିଲା।
ଗୋଲରହଟୀ ଗ୍ରାମରେ କେବଳ ଗୋଲ୍ଲା ସମ୍ପ୍ରଦାୟର ଲୋକ ବସବାସ କରନ୍ତି । ସେହି ଗ୍ରାମକୁ ପରିଦର୍ଶନ ପାଇଁ ସରକାରୀ ଅଧିକାରୀଙ୍କ ସହ ଏ.ନାରାୟଣସ୍ଵାମୀ ଯାଇଥିବା ବେଳେ ତାଙ୍କୁ ଗ୍ରାମବାସୀମାନେ ଅଛୁଆଁ ବୋଲି କହିବା ସହ ଗ୍ରାମରୁ ବାହାରି ଯିବା ପାଇଁ କହିଥିଲେ । ଗ୍ରାମରେ କୌଣସୀ ଅନୁସୂଚିତ ଜାତିର ଲୋକମାନଙ୍କୁ ପ୍ରବେଶ କରିବାକୁ ଅନୁମତି ନାହିଁ। ବହୁ ସମୟ ଧରି ଯୁକ୍ତିତର୍କ କରିବା ପରେ ଏ.ନାରାୟଣସ୍ଵାମୀ ଅଧିକାରୀଙ୍କ ସହ ସେଠାରୁ ଫେରି ଯାଇଥିଲେ । ପରେ ପୁଲିସ ଘଟଣାସ୍ଥଳରେ ପହଞ୍ଚି ଏହି ଘଟଣାର ତଦନ୍ତ ଆରମ୍ଭ କରିଛି ।
ଏନେଇ ଚିତ୍ରଦୂର୍ଗ ଏସପି କହିଛନ୍ତି ଯେ, ଗ୍ରାମ ମଧ୍ୟକୁ ପ୍ରବେଶ କରିବା ପାଇଁ କିଏ ସାଂସଦକୁ ବାରଣ କରିଥିଲେ ତାହା ଏଯାଏଁ ସ୍ପଷ୍ଟ ହୋଇପାରିନାହିଁ । ଅଭିଯୁକ୍ତଙ୍କୁ ଧରିବା ପାଇଁ ଉଦ୍ୟମ ଚାଲିଛି । ଏହା ସହ ଯାଞ୍ଚ ପାଇଁ ମଧ୍ୟ ନିର୍ଦେଶ ଦିଆଯାଇଛି । ଏହି ଘଟଣାକୁ ନେଇ ଏ.ନାରାୟଣସ୍ଵାମୀ ଦୁଃଖ ପ୍ରକାଶ କରି କହିଛନ୍ତି ଯେ, ଗ୍ରାମବାସୀଙ୍କ ସମସ୍ୟା ବୁଝିବାକୁ ଏବଂ ବିଭିନ୍ନ ସୁବିଧା ପ୍ରଦାନ କରିବାକୁ ସରକାରୀ ଅଧିକାରୀଙ୍କ ସହ ସେଠାକୁ ଯାଇଥିଲି। କିନ୍ତୁ ଦଳିତ ଜାତିର ଲୋକଙ୍କୁ ପ୍ରବେଶର ଅନୁମତି ନାହିଁ ବୋଲି କହି ଗ୍ରାମବାସୀମାନେ ସେଠାରୁ ମୋତେ ଫେରାଇ ଦେଇଥିଲେ ।
