ସମଗ୍ର ଦେଶରେ ଆଜି କାରଗିଲ ବିଜୟ ଦିବସ ପାଳନ କରାଯାଉଛି । ଏହି ଅବସରରେ ରାଷ୍ଟ୍ରପତି, ଊପରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ସମେତ ଦେଶର ମାନ୍ୟଗଣ୍ୟ ବ୍ୟକ୍ତି ବିଶେଷ ଦେଶ ପାଇଁ ଜୀବନକୁ ଉତ୍ସର୍ଗ କରିଥିବା ସାହାସୀ ସହିଦଙ୍କ ବୀରତ୍ବକୁ ସ୍ମରଣ କରି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । କିନ୍ତୁ ଏସବୁ ମଧ୍ୟରେ ଆମେ ଏଭଳି କିଛି ସାହସୀ ଯୋଦ୍ଧାମାନଙ୍କୁ ଭୁଲି ଯାଇଛେ ଯେଉଁମାନେ ନେପଥ୍ୟରେ ରହି କାରଗିଲ୍ ଯୁଦ୍ଧ ସମୟରେ ଏକ ଗୁରୁତ୍ବପୂର୍ଣ୍ଣ ଭୂମିକା ତୁଲାଇ ଥିଲେ । ସେମାନଙ୍କ ମଧ୍ୟରୁ ପାଇଲଟ୍ ଗୁଞ୍ଜନ ସକ୍ସେନା ଏବଂ ଶ୍ରୀବିଦ୍ୟା ରାଜନ ଅନ୍ୟତମ । ଏହି ଦୁଇ ମହିଳା ପାଇଲଟ୍ କାରଗିଲ ଯୁଦ୍ଧ ସମୟରେ କେବଳ ଶତ୍ରୁପକ୍ଷ ସହ ଲଢିଥିଲେ ତାହା ନୁହେଁ, ନିୟନ୍ତ୍ରଣ ରେଖା ଆରପଟେ ଥିବା ସୈନିକମାନଙ୍କୁ ଉଦ୍ଧାର ପାଇଁ ଚେଷ୍ଟା କରୁଥିଲେ ଏବଂ ଆହତ ଯବାନମାନଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରିଥିଲେ । ପାଇଲଟ୍ ଗୁଞ୍ଜନ ସକ୍ସେନାଙ୍କ ଏହି ସାହାସୀ ଉଦ୍ୟମ ପାଇଁ ତାଙ୍କୁ ଶୌର୍ଯ୍ୟ ଚକ୍ର ପ୍ରଦାନ କରାଯାଇଥିଲା ।
୨୦ ବର୍ଷ ପୂର୍ବେ ବାୟୁସେନାରେ ମହିଳାଙ୍କ ପଇଁ ବର୍ତ୍ତମାନ ଭଳି ସୁବିଧା ସୁଯୋଗ ଉପଲବ୍ଧ ନଥିଲା। ସର୍ଟ ସର୍ଭିସ୍ କମିଶନ ମାଧ୍ୟମରେ ମାତ୍ର ୭ ବର୍ଷ ପାଇଁ ମହିଳାଙ୍କୁ ଦେଶ ସେବା କରିବା ପାଇଁ ସୁଯୋଗ ମିଳିଥିଲା। ଏଭଳି ପରିସ୍ଥିତିରେ ସେନା ପରିବାରରୁ ଆସିଥିବା ଗୁଞ୍ଜନ ସକ୍ସେନା ଏବଂ ଶ୍ରୀବିଦ୍ୟା ରାଜନ ୨୫ ଜଣ ଟ୍ରେନି ପାଇଲଟ୍ ଙ୍କ ମଧ୍ୟରେ ଥିଲେ । ୧୯୯୪ରେ ଭାରତୀୟ ବାୟୁସେନାର ପ୍ରଥମ ମହିଳା ବ୍ୟାଚରେ ସେମାନଙ୍କୁ ସାମିଲ ହେବାର ସୁଯୋଗ ମିଳିଥିଲା ।
୧୯୯୯ କାରଗିଲ୍ ଯୁଦ୍ଧରେ ସେମାନଙ୍କୁ ଦେଶ ପାଇଁ କିଛି କରି ଦେଖାଇବାର ଅବସର ମିଳିଥିଲା। ଏହା ପୂର୍ବରୁ ସେମାନେ ପାଇଲଟ୍ ଜେଟ୍ ଚଳାଇ ନଥିଲେ । ଯୁଦ୍ଧ ସମୟରେ ଆବଶ୍ୟକ ପଡିବାରୁ ଏହି ଦୁଇ ଜଣଙ୍କୁ ଯୁଦ୍ଧ କ୍ଷେତ୍ରକୁ ପଠାଇବାର ନିଷ୍ପତ୍ତି ନିଆଯାଇଥିଲା। ଆହତ ଯବାନଙ୍କୁ ଉଦ୍ଧାର କରିବା, ଖାଦ୍ୟ ସାମଗ୍ରୀ ଯୋଗାଇବା ଏବଂ ସବୁଠୁ ଗୁରୁତ୍ବପୂର୍ଣ୍ଣ ପାକିସ୍ତାନର କାର୍ଯ୍ୟାକଳାପ ଉପରେ ନଜର ରଖିବାକୁ ଦାୟିତ୍ବ ସେମାନଙ୍କୁ ଦିଆଯାଇଥିଲା।
