କାମାକ୍ଷାନଗର : କାମାକ୍ଷାନଗର ଦେଇ ଯାଇଥିବା ୫୩ ନଂ. ଜାତୀୟ ରାଜପଥର ଆଳତୁମା ଛକ ଠାରେ ଗତ ବୁଧବାର ବିଳମ୍ବିତ ରାତିରେ ଏକ ଗାଡି ଧକ୍କାରେ ବାଇକ ଆରୋହୀ ଦମ୍ପତ୍ତି ଗୁରୁତର ଭାବେ ଆହତ ହୋଇଥିଲେ। ସେମାନଙ୍କୁ ଚିକିତ୍ସା ପାଇଁ କଟକ ସ୍ଥାନାନ୍ତର କରାଯାଇଥିଲା। କଟକରେ ଚିକିତ୍ସାଧୀନ ଅବସ୍ଥାରେ ରବିବାର ସ୍ୱାମୀ ବିପ୍ର ପାତ୍ର ଙ୍କର ମୃତ୍ୟୁ ହୋଇଛି ।ଏହାର ପ୍ରତିବାଦରେ ବସ୍ତିବାସିନ୍ଦାମାନେ ଜାତୀୟ ରାଜପଥକୁ ଅବରୋଧ କରିଥିଲେ। ଫଳରେ କାମାକ୍ଷାନଗର ତାଳଚେର ମଧ୍ୟରେ ଯାତାୟାତ ଠପ ହୋଇ ପଡ଼ିଥିବା ବେଳେ ଉଭୟ ଦିଗରେ ଭାରୀଯାନ ଅଟକି ରହିଥିଲା।
ଆଳତୁମା ଗ୍ରାମର ବଡଗିଲା ହରିଜନ ବସ୍ତିର ବିପ୍ର ପାତ୍ର ଓ ତାଙ୍କ ପତ୍ନୀ ମଞ୍ଜୁଲତା ଆଳତୁମା ଗ୍ରାମରୁ ଏକ ବାଇକରେ ଗତ ବୁଧବାର ବିଳମ୍ବିତ ରାତିରେ ଘରକୁ ଫେରୁଥିଲେ। ସେମାନେ ଘରକୁ ଫେରୁଥିବାବେଳେ ଜାତୀୟ ରାଜପଥର ଆଳତୁମା ଛକ ଠାରେ ସେମାନଙ୍କୁ ଏକ ଅଜଣା ଗାଡି ଧକ୍କା ଦେଇଥିଳା। ଏଥିରେ ଉଭୟ ଦମ୍ପତି ଗୁରୁତର ଆହତ ହୋଇ କଟକ ବଡ ଡାକ୍ତରଖାନାରେ ଚିକିତ୍ସାଧୀନ ହେଉଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ଆଜି ସ୍ୱାମୀ ବିପ୍ର ଙ୍କର ମୃତ୍ୟୁ ହୋଇଛି।
ବିପ୍ରଙ୍କର ମୃତ୍ୟୁ ଖବର ପ୍ରଚାରିତ ହେବା ପରେ ବଡ଼ଗିଲା ବସ୍ତିର ବାସିନ୍ଦାମାନେ ଆଳତୁମା ଠାରେ ଜାତୀୟ ରାଜପଥକୁ ଅବରୋଧ କରିଛନ୍ତି।ଖବର ପାଇ ଏସ୍ଡ଼ିପିଓ ଜ୍ଞାନରଞ୍ଜନ ମିଶ୍ର, ଅତିରିକ୍ତ ତହସିଲଦାର ସୂର୍ଯ୍ୟକାନ୍ତ ବରାଳ ଘଟଣା ସ୍ଥଳରେ ପହଞ୍ଚି ବୁଝାସୁଝା କରିଥିଲେ।
