ଗୋରୁ ବୋଝେଇ ଟ୍ରକ ଜବତ

କାମାକ୍ଷାନଗର : କାମାକ୍ଷାନଗର ବ୍ଲକ ତଥା ତୁମୁସିଙ୍ଗା ଥାନା ବରକୋଳି ଗ୍ରାମ ନିକଟରୁ ୫ ଟି ଗୋରୁ ବୋଝେଇ ଗାଡିକୁ ଜବତ କରାଯାଇଛି। ଗାଡିରେ ଥିବା ୨୬ଟି ଗୋରୁ ଉଦ୍ଧାର କରାଯାଇଥିବା ବେଳେ ,ଚାଲାଣ କରୁଥିବା ୧୧ ଜଣ ମାଫିଆଙ୍କୁ ଅଟକ ରଖିଲା ପୁଲିସ । ଥାନା ଅଧିକାରୀ ପ୍ରଦୀପ ରଂଜନ ପାତ୍ର ବିଶେଷ ସୂତ୍ରରୁ ଖବର ପାଇ ସଦଳବଳେ ବରକୋଳି ନିକଟରେ ଜଗି ରହିଥିବା ବେଳେ ଗୋରୁ ଚାଲାଣ ସମୟରେ ଅଟକାଇଥିଲେ। ଗୋରୁ ମାନଙ୍କୁ ଅତି ଦୟନୀୟ ଭାବରେ ବନ୍ଧା ଯାଇ ବାହାର ରାଜ୍ୟକୁ ଚାଲାଣ କରାଯାଉଥିଲା। ଏହି ବାଟ ଦେଇ ପ୍ରତ୍ୟେକ ଦିନ ଶହ ଶହ ସଂଖ୍ୟାରେ ଗୋରୁ ଚାଲାଣ ହେଉଥିବାର ଖବର ରହିଥିଲା। ସ୍ଥାନୀୟ ଲୋକଙ୍କ ସହାୟତାରେ ଏହି ଗୋରୁ ଚାଲାଣ କରାଯାଉଥିଲା। ସମସ୍ତ ଗୋରୁ ଉଦ୍ଧାର କରାଯାଇ ଥାନା ପରିସରରେ ରଖାଯାଇଛି। ଏହାସହ ୧୧ ଜଣ ଗୋରୁ ମାଫିଆଙ୍କୁ ଅଟକ ରଖି ତଦନ୍ତ ଚଳାଇଛି ପୁଲିସ। ଜବତ ହୋଇଥିବା ଗାଡି ଗୁଡିକ ପୂର୍ବରୁ ମଧ୍ୟ ଗୋରୁ ଚାଲାଣ ହେଉଥିବାରୁ ଥାନା ତରଫରୁ ଜବତ କରାଯାଇଥିଲା। ପରବର୍ତ୍ତି ସମୟରେ ଥାନାରୁ ଗାଡି ଗୁଡିକ ରିଲିଜ ହେବା ପରେ ପୁଣି ଗୋରୁ ଚାଲାଣ କରାଯାଉଥିବାର ଜଣା ଯାଇଛି।