କଲ୍ୟାଣସିଂହପୁର: ରାୟଗଡା ଜିଲା କଲ୍ୟାଣସିଂହପୁରରେ ନୂଆ ତିଆରି ହୋଇଥିବା ପୋଲ ପାର୍ଶ୍ୱର ରାସ୍ତା(ଆପ୍ରୋଚ ରୋଡ୍) ଫାଟି ଆଁ କରିବା ସହ ଦବି ରହିଛି। ଏଥିସହ ପଥର ପେକିଙ୍ଗ ମଧ୍ୟ ଦବି ଯାଇଥିବା ଦେଖିବାକୁ ମିଳିଛି, ଯାହାକୁ ନେଇ ଅଞ୍ଚଳବାସୀ ଭୟଭୀତ ଅଛନ୍ତି । ନାଗାବଳୀ ନଦୀର ପୋଲ ଦେଇ ଅନେକ ଯାନବାହାନ ଯାତାୟତ କରୁଥିବାବେଳେ ବିଦ୍ୟାଳୟ ଛାତ୍ରଛାତ୍ରୀମାନେ ମଧ୍ୟ ଯାତାୟତ କରିଥାନ୍ତି । ଦୁଇ ଦିନ ହେଲା ବର୍ଷା ଲାଗି ରହିଥିବାରୁ ପୋଲକୁ ଲାଗିଥିବା ରାସ୍ତା ଫାଟି ଆଁ କରିଥିବାବେଳ ରାସ୍ତାଟି ଦବିଦବି ଯାଉଛି । ଅନ୍ୟପଟେ ପଥର ପେକିଙ୍ଗ ମଧ୍ୟ ଦବି ଯାଇଛି । ଏହିରାସ୍ତା ଦେଇ ବଡବଡ ଯାନବାହାନ ଯାତାୟତ କରୁଛି କେତେବେଳେ ରାସ୍ତାଟି ଦବିଯାଇ ଗର୍ତ୍ତ ସୃଷ୍ଟି ହୋଇଯିବ ତାହା କହି ହେବନି । ଯଦି ଗର୍ତ୍ତ ହୋଇଯାଏ, ତାହେଲ କଲ୍ୟାଣସିଂହପୁର ରାୟଗଡା ଯାତାୟତ ରାସ୍ତାଟି ବାହ୍ୟ ଜଗତରୁ ବିଚ୍ଛିନ୍ନ ହୋଇଯିବ । ବର୍ଷା ଦିନ ଆରମ୍ଭ ହୋଇଗଲାଣି, ତେଣୁ ଯଦି ତୁରନ୍ତ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ନ ଦିଏ କଲ୍ୟାଣସିଂହପୁର ବାସିନ୍ଦା ନାହିଁ ନଥିବାର ଅସୁବିଧାର ସମ୍ମୁଖୀନ ହେବେ ବୋଲି ଅଞ୍ଚଳବାସୀ କହିଛନ୍ତି । ଏହି ପୋଲ ଓ ରାସ୍ତା କାମ ସମୟରେ ପ୍ରଶାସନ ସଠିକ ତଦାରଖ ନ କରିବାରୁ ଠିକାଦାର ନିଜ ଇଛା ଅନୁଯାୟୀ ତରବରିଆ ଭାବେ କାମ ସମ୍ପୂର୍ଣ୍ଣ କରିଥିବାରୁ ବାରମ୍ବାର ଏଭଳି ପୋଲ ନିକଟ ରାସ୍ତା ଓ ପଥର ପେକିଙ୍ଗ ଦବି ଯାଉଛି । ଠିକ୍ ଏହିଭଳି ଗତବର୍ଷ ମଧ୍ୟ ପୋଲର ଉଭୟ ପାର୍ଶ୍ୱରେ ଗାର୍ଡଓ୍ବାଲ ଦବି ଯାଇଥିଲା । ଗଣମାଧ୍ୟମରେ ଖବର ପ୍ରସାରଣ ପରେ ତରବରିଆ ଭାବେ ଉକ୍ତ ଠିକାଦାର ପୁଣି ନିମ୍ନମାନର ଗାର୍ଡଓ୍ବାଲ ତିଆରି କରି ପୋଲର ଉଭୟ ପାର୍ଶ୍ୱରେ ପଥର ପେକିଙ୍ଗ କରି ଛାଡ଼ିଦେଲେ, ତାହା ପୁଣି ଏବେ ଦବିବାରେ ଲାଗିଛି । ଏହା ଦେଖି ଅଞ୍ଚଳବାସୀ ଭୟଭୀତ ହୋଇ ପଡ଼ିଛନ୍ତି ।
ପ୍ରକାଶ ଥାଉକି, ଗତ ୨୦୧୭ ମସିହା ଜୁଲାଇ ୧୬ ତାରିଖରେ ବାଦଲଫଟା ବର୍ଷା ହୋଇଥିବାରୁ କଲ୍ୟାଣସିଂହପୁର ବ୍ଲକରେ ବନ୍ୟା ହୋଇ ଧନ ସମ୍ପତ୍ତି ନଷ୍ଚ ହେବା ସାଙ୍ଗକୁ ପାଞ୍ଚଟି ପୋଲ ଭାସି ଯାଇଥିଲା । କଲ୍ୟାଣସିଂହପୁର ସଦର ମହକୁମା ନାଗାବଳୀ ନଦୀର ପୋଲଟି ବହୁ ପୁରୁଣା ଓ ଦୁର୍ବଳ ହୋଇଥିବାରୁ ସରକାରଙ୍କ ପକ୍ଷରୁ ଅନ୍ୟପଟେ ନୂତନ ପୋଲ ନିର୍ମାଣ କରାଗଲା । କଲ୍ୟାଣସିଂହପୁରଠାରୁ ରାୟଗଡା ଯିବାକୁ ଏହି ରାଜ୍ୟ ରାଜପଥ ହୋଇଥିବାବେଳେ ଏହି ପୋଲ ଦେଇ ଅନେକ ଛୋଟବଡ଼ ଯାନବାହାନ ଓ ସ୍କୁଲ ଛାତ୍ରଛାତ୍ରୀ ନିତିଦିନିଆ ଯାତାୟାତ କରଥାନ୍ତି । ତୁରନ୍ତ ଜିଲା କର୍ତ୍ତୃପକ୍ଷକ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି । ଏ ନେଇ ପୂର୍ତ୍ତ ବିଭାଗ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରିନି ।
ସୂଚନାଯୋଗ୍ୟ, ୨୦୨୩ ମସିହା ଜୁଲାଇ ୩୧ ତାରିଖରେ ଉପରସାଜା ଗ୍ରାମରେ ନିର୍ମାଣାଧୀନ କଲଭର୍ଟ ଭୁଶୁଡି ୪ଶିଶୁ ସମେତ ଜଣେ ଯୁବକ ମୋଟ ୫ଜଣଙ୍କ ମୃତ୍ୟୁ ହୋଇଥିବାବେଳେ ଜଣେ ବାଳକ ଉଦ୍ଧାର ହୋଇଥିଲା ।
Comments are closed.