କଲମପୁର : ହାତୀ ନଦୀର ଟେମରା ପରୁଆଗୁଡା ଘାଟ ମଝିରୁ ମଙ୍ଗଳବାର ଜଣେ ଅଜଣା ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଛି। ଉକ୍ତ ଘାଟରେ ଏକ ମୃତଦେହ ଭାସୁଥିବା ନେଇ ପ୍ରଚାର ହେବା ପରେ ଏନେଇ ତୁରନ୍ତ ଜୟପାଟଣା ଓ କଲମପୁର ଥାନାକୁ ସୂଚନା ଦିଆଯାଇଥିଲା। କଲମପୁର ପୁଲିସର ଅନୁରୋଧକ୍ରମେ କଲମପୁର ଅଗ୍ନିଶମ ବାହିନୀ ହାତୀ ନଦୀର ବିଜମରା ପଂଚାୟତ ଅଧିନସ୍ଥ ପାଣିଗାଁ ଘାଟ ନିକଟରେ ପହଞ୍ଚିଥିଲେ। ଘାଟର ଅଳ୍ପ ଦୂର ମଧ୍ୟରେ ମୃତଦେହ ଥିବା ଦେଖିବା ପରେ ଜୟପାଟଣା ଥାନା ଅଧିକାରୀ ବାସୁଦେବ ଛତ୍ରିଆଙ୍କ ଉପସ୍ଥିତିରେ କଲମପୁର ଅଗ୍ନିଶମ ବାହିନୀର ଭାରପ୍ରାପ୍ତ ଅଧିକାରୀ ଶଙ୍କର ପ୍ରସାଦ ତ୍ରିପାଠୀଙ୍କ ନେତୃତ୍ୱରେ ବନ ବିହାରୀ ପ୍ରଧାନ, ଡିସେମ୍ବର ବୁଡେକ, ନିରଞ୍ଜନ ଦାଶ, ସରୋଜ ପ୍ରଧାନ ପ୍ରମୁଖ ଅଗ୍ନିଶମ ବାହିନୀର କର୍ମଚାରୀ ଦିନ ୨ଟା ବେଳେ ମୃତଦେହ ଉଦ୍ଧାର କରିଥିଲେ। ମୃତଦେହଟି କାହାର ଓ କେଉଁ ପରିସ୍ଥିତିରେ ହାତୀ ନଦୀରେ ପଡ଼ିଛି ସେନେଇ ତଦନ୍ତ ଜାରି ରହିଛି।
ଅପରପକ୍ଷେ, ଗତ ୩ ଦିନ ତଳେ ଶିବରାତ୍ର ଦିନ ସଂଧ୍ୟାରୁ ନିଖୋଜ ହେଇଥିବା ପୋଲକାମୁଣ୍ଡା ଗ୍ରାମର ଜନୈକ ଯୁବକ ଦିଲିପ ବାଗରଙ୍କ ମୃତଦେହ ବୋଲି ପ୍ରଚାର ହୋଇଥିଲା। କିନ୍ତୁ ମୃତଦେହ ଉଦ୍ଧାର ହେବା ପରେ ଏହା ଦିଲିପର ନୁହେଁ ବୋଲି ପରିବାର ଲୋକ କହିଥିଲେ। ବର୍ତମାନ ସୁଦ୍ଧା ମୃତଦେହ ଚିହ୍ନଟ ହେଇନଥିବାରୁ ଜୟପାଟଣା ପୁଲିସ ତରଫରୁ ସାଇନଟିଫିକ୍ ଟିମର ସହାୟତାରେ ତଦନ୍ତ କରାଯାଉଥିବା ଥାନା ଅଧିକାରୀ ବାସୁଦେବ ଛତ୍ରିଆ ସୂଚନା ଦେଇଛନ୍ତି।
