ମୁମ୍ବଇ : ଦୀର୍ଘ ୪ଦଶକରୁ ଅଧିକ ସମୟ ନିଜ ଅଭିନୟ ମାଧ୍ୟମରେ ଦର୍ଶକଙ୍କୁ ବାନ୍ଧି ରଖିଥିବା ବରିଷ୍ଠ ଅଭିନେତା କାଦର ଖାନ ଅସୁସ୍ଥ ହୋଇପଡିଛନ୍ତି। ୮୧ ବର୍ଷୀୟ କାଦର ଖାନଙ୍କ ଶ୍ବାସକ୍ରିୟାରେ ସମସ୍ୟା ଦେଖା ଦେବାରୁ ଡାକ୍ତର ତାଙ୍କୁ ଭେଣ୍ଟିଲେଟରରେ ରଖିଛନ୍ତି। ସୂଚନା ଅନୁସାରେ, କାଦରଙ୍କ ମସ୍ତିଷ୍କ କାମ କରିବା ବନ୍ଦ ହୋଇଯାଇଛି ଓ ତାଙ୍କ ଅବସ୍ଥା ଖୁବ୍ ଗମ୍ଭୀର ରହିଛି। କାଦର ଖାନଙ୍କ ପୁଅ ସରଫରାଜ ଏହି ସୂଚନା ଦେଇଛନ୍ତି।
ଦୀର୍ଘଦିନ ଧରି କାଦର ଅସୁସ୍ଥ ଅଛନ୍ତି ଓ ସେ ତାଙ୍କ ପୁଅ ଓ ବୋହୁଙ୍କ ପାଖରେ କାନାଡ଼ାରେ ରହୁଛନ୍ତି। ତେବେ ଗତ କିଛିଦିନ ହେବ ଅବସ୍ଥା ଗୁରୁତର ହେବାରେ ଲାଗିଛି। ଏବେ ବିଦେଶରେ ତାଙ୍କ ଚିକିତ୍ସା ଜାରି ରହିଛି।
କାଦର ଖାନ ପ୍ରାୟ ୩୦୦ ଚଳଚ୍ଚିତ୍ରରେ ନିଜ ଅଭିନୟର ଯାଦୁ ଦେଖାଇଛନ୍ତି। ଗୋବିନ୍ଦାଙ୍କ ସହ ତାଙ୍କ ଯୋଡି ଅନେକ ହିଟ୍ ଚଳଚ୍ଚିତ୍ର ଭେଟି ଦେଇଛନ୍ତି। ଜଣେ ଭଲ ସଂଳାପ ଲେଖକ ଭାବରେ ମଧ୍ୟ ତାଙ୍କର ନାଁ ରହିଛି। ଚଳଚ୍ଚିତ୍ର କ୍ଷେତ୍ରରେ ଅବଦାନ ପାଇଁ ବର୍ଷ ୨୦୧୩ରେ ତାଙ୍କୁ ସାହିତ୍ୟ ଶିରୋମଣୀ ସମ୍ମାନରେ ସମ୍ମାନିତ କରାଯାଇଥିଲା।
