‘ଚକାଆଖି ସବୁ ଦେଖୁଛି, ଅଳିଆ ପକାନ୍ତୁ ନାହିିଁ ’

ପୁରୀ: ଶ୍ରୀକ୍ଷେତ୍ରର ବଡ଼ଦାଣ୍ଡ ଏବଂ ବିସ୍ତୀର୍ଣ୍ଣ ବେଳାଭୂମିକୁ ସ୍ୱଚ୍ଛ ଓ ସୁନ୍ଦର ରଖିବାକୁ ଜଣେ ଜାପାନ ପର‌୍ୟ୍ୟଟକଙ୍କ ନିଆରା ଉଦ୍ୟମ ସହରବାସୀ ଓ ପ୍ରଶାସନିକ ଅଧିକାରୀଙ୍କୁ ଚକିତ କରିଛି। ସୁଦୂର ଜାପାନରୁ ବୁଲିବାକୁ ଆସିଥିବା ଆକିଆ ଦୋଇ ଶ୍ରୀକ୍ଷେତ୍ରକୁ ଆସିବା ପରେ ଜଗା ପ୍ରେମରେ ପଡ଼ିଯାଇଛନ୍ତି। ଏହି ପବିତ୍ର ରେଣୁରେ ମହାପ୍ରଭୁ ଶ୍ରୀଜଗନ୍ନାଥ ବିରାଜମାନ କରିଥିବାବେଳେ ମହୋଦଧିର ବେଳାଭୂମିକୁ ପବିତ୍ର କରିବା ପାଇଁ ସେ ସଂକଳ୍ପବଦ୍ଧ ହୋଇଛନ୍ତି। ୬ମାସ ଧରି ଆବର୍ଜନା ସଫା କରିବା କାର‌୍ୟ୍ୟରେ ସେ ନିଜକୁ ନିୟୋଜିତ କରିଛନ୍ତି। ବଡ଼ଦାଣ୍ଡ, ସମୁଦ୍ର ବେଳାଭୂମି ଓ ସହରର ବିଭିନ୍ନ ସ୍ଥାନରୁ ପ୍ରତିଦିନ ଅଳିଆ ସଫା କରୁଛନ୍ତି ପର‌୍ୟ୍ୟଟକ ଆକିଆ। ସେ ମହାପ୍ରଭୁଙ୍କ ଚିତ୍ର ଅଙ୍କନ କରି ‘ଜଗନ୍ନାଥ ବଡ଼ବଡ଼ ଆଖିରେ ସବୁ ଦେଖୁଛନ୍ତି। ଏଣେ ତେଣେ ଅଳିଆ ପକାନ୍ତୁ ନାହିଁ। ନିକଟରେ ଥିବା ଡଷ୍ଟବିନ ବ୍ୟବହାର କରନ୍ତୁ’ ବୋଲି ସେ ଅନୁରୋଧ କରିବା ସହ ଜନସାଧାରଣରେ ସଚେତନତା ସୃଷ୍ଟି କରିଚାଲିଛନ୍ତି।
ଏ ସମ୍ପର୍କରେ ଇଣ୍ଡିଆ-ଜାପାନ ଫ୍ରେଣ୍ଡସିପ୍‌ ସେଣ୍ଟରର ସଭାପତି ଶ୍ରୀମନ୍ତ ଦାଶ କହିଛନ୍ତି ଯେ, ଜାପାନ ପର‌୍ୟ୍ୟଟକ ଆକିଆ ୬ମାସ ହେବ ସଫେଇ କାର୍ଯ୍ୟରେ ନିୟୋଜିତ ଅଛନ୍ତି। ମହାପ୍ରଭୁଙ୍କ ଫଟୋ ଦେଖାଇ ସେ ସଚେତନ କରୁଥିବା ସମସ୍ତଙ୍କ ନଜରକୁ ଆସିଛି।