ମାମଲା ରୁଜୁ ବନ୍ଦ କରିବାକୁ କେନ୍ଦ୍ର ସରକାରଙ୍କ ନିର୍ଦ୍ଦେଶ
ନୂଆଦିଲ୍ଲୀ: ସୂଚନା ପ୍ରଯୁକ୍ତି (ଆଇଟି) ଆଇନ ଧାରା ୬୬(କ)ରେ ମାମଲା ରୁଜୁ ବନ୍ଦ କରିବାକୁ କେନ୍ଦ୍ର ସରକାର ବୁଧବାର ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରଙ୍କୁ ଚିଠି ଲେଖିଛନ୍ତି। ଏହି ଆଇନ ଅନୁଯାୟୀ ରୁଜୁ ହୋଇଥିବା ସମସ୍ତ ମାମଲାକୁ ତୁରନ୍ତ ପ୍ରତ୍ୟାହାର କରିବାକୁ କେନ୍ଦ୍ର ସରକାର କହିଛନ୍ତି। ସୂଚନା ପ୍ରଯୁକ୍ତି ଆଇନର ଉକ୍ତ ଧାରାକୁ ୬ବର୍ଷ ତଳୁ ସର୍ବୋଚ୍ଚ ନ୍ୟାୟାଳୟ ଉଚ୍ଛେଦ କରିସାରିଥିବା ବେଳେ ଏହି ଧାରାରେ ଏବେ ବି ଅନେକ ମାମଲା ରୁଜୁ ହେବା ଓ ନିମ୍ନ ଅଦାଲତରେ ଏହିସବୁ ମାମଲାର ଶୁଣାଣି ହେବାକୁ ନେଇ ନିକଟରେ ସର୍ବୋଚ୍ଚ ଅଦାଲତ ଆଶ୍ଚର୍ଯ୍ୟ ପ୍ରକାଶ କରିଥିଲେ।
ସୂଚନା ପ୍ରଯୁକ୍ତି ଆଇନ ୨୦୦୦ର ଧାରା ୬୬ (କ) ଅନୁଯାୟୀ କୌଣସି ବ୍ୟକ୍ତି ଯଦି ଇଲେକ୍ଟ୍ରୋନିକ୍ ମାଧ୍ୟମରେ ସୂଚନା ପ୍ରେରଣ କରେ ତାହା ଅପରାଧ ବିବେଚନା କରାଯିବ। ତେବେ ୨୦୧୫ ମାର୍ଚ୍ଚ ୨୪ରେ ସର୍ବୋଚ୍ଚ ନ୍ୟାୟାଳୟ ଏହି ଧାରାକୁ ଅବୈଧ ଘୋଷଣା ପୂର୍ବକ ଉଚ୍ଛେଦ କରିଥିଲେ। ତେଣୁ ଏହି ଧାରାରେ ଏଣିକି ଆଉ କୌଣସି ମାମଲା ରୁଜୁ ନ କରିବା ଲାଗି ସମସ୍ତ ଥାନା ଓ ଆଇନ ରକ୍ଷାକାରୀ ଏଜେନ୍ସିକୁ ଆବଶ୍ୟକ ନିର୍ଦେଶ ଦେବାକୁ କୁହାଯାଇଛି।
