ମୁମ୍ବଇ: ଟିମ୍ ଇଣ୍ଡିଆର ମୁଖ୍ୟ କୋଚ୍ ପଦବୀ ପାଇଁ ଶୁକ୍ରବାର ମୁମ୍ବଇସ୍ଥିତ ବିସିସିଆଇ ମୁଖ୍ୟାଳୟରେ ସାକ୍ଷାତ୍କାର ଚାଲିଛି। ଏହି ପଦବୀ ପାଇଁ ମୋଟ ୬ ଜଣ ଆବେଦନ କରିଛନ୍ତି। ସେମାନଙ୍କ ମଧ୍ୟରେ ୩ ବିଦେଶୀ ରହିଛନ୍ତି। ସକାଳ ୧୦ଟାରୁ ସାକ୍ଷାତ୍କାର ଆରମ୍ଭ ହୋଇଛି। ପୂର୍ବତନ କ୍ରିକେଟର କପିଳ ଦେବଙ୍କ ନେତୃତ୍ଵାଧୀନ କ୍ରିକେଟ ପରାମର୍ଶଦାତା କମିଟି(ସିଏସି)କୁ ଭାରତୀୟ ଟିମ୍ର ନୂଆ କୋଚ୍ ଚୟନ କରିବା ଦାୟିତ୍ଵ ଦିଆଯାଇଛି। ଏହି କମିଟିରେ ଅଂଶୁମାନ ଗାୟକୱା ଏବଂ ଶାନ୍ତା ରଙ୍ଗାସ୍ବାମୀ ରହିଛନ୍ତି। ବିସିସିଆଇ ସନ୍ଧ୍ୟା ୭ଟାରେ ଖବରଦାତା ସମ୍ମିଳନୀ ଜରିଆରେ ନୂଆ କୋଚ୍ଙ୍କ ନାମ ଘୋଷଣା କରିବ।
ବିସିସିଆଇ ଟିମ୍ ଇଣ୍ଡିଆର ମୁଖ୍ୟ କୋଚ୍ ପାଇଁ ୬ଜଣଙ୍କ ନାମ ତାଲିକା ପ୍ରସ୍ତୁତ କରିଛି। ଏଥିରେ ବର୍ତ୍ତମାନର କୋଚ୍ ରବି ଶାସ୍ତ୍ରୀଙ୍କ ନାମ ସାମିଲ ରହିଛି। ଶାସ୍ତ୍ରୀଙ୍କ ବ୍ୟତୀତ ଅନ୍ୟ ଦୁଇ ଜଣ ଭାରତୀୟ ମଧ୍ୟ ରହିଛନ୍ତି। ସେମାନେ ହେଲେ ପୂର୍ବତନ କ୍ରିକେଟର ଲାଲଚାନ୍ଦ ରାଜପୁତ ଏବଂ ରବୀନ ସିଂହ। ଏମାନଙ୍କ ବ୍ୟତୀତ ତାଲିକାରେ ରହିଥିବା ୩ ବିଦେଶୀ ହେଉଛନ୍ତି ଅଷ୍ଟ୍ରେଲିଆର ପୂର୍ବତନ ଅଲରାଉଣ୍ଡର ଟମ୍ ମୁଡ୍ଡୀ, ମାଇକ ହାସନ ଏବଂ ଫିଲ ସିମନ୍ସ। ତେବେ ଏହି ୬ଜଣଙ୍କ ମଧ୍ୟରେ ରବି ଶାସ୍ତ୍ରୀଙ୍କ ନାମ ଆଗରେ ରହିଥିବା କୁହାଯାଉଛି।
