ନୂଆଦିଲ୍ଲୀ: ସଶସ୍ତ୍ର ବାହିନୀକୁ ଆଧୁନିକୀକରଣ କରିବାକୁ କେନ୍ଦ୍ର ସରକାର ଅଗ୍ରାଧିକାର ଦେଉଥିବା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି। ସେ କହିଛନ୍ତି, ସଶସ୍ତ୍ର ବାହିନୀର ସମସ୍ତ ଆବଶ୍ୟକତାର ଦେଶୀୟ ଜ୍ଞାନକୌଶଳରେ ପୂରଣ କରାଯିବ। ଭାରତ ଡାଇନାମିକ୍ସ ଲିମିଟେଡ୍ର ସୁବର୍ଣ୍ଣ ଜୟନ୍ତୀ ଉତ୍ସବ ପାଳନ ଅବସରରେ ହାଇଦ୍ରାବାଦ୍ଠାରେ ସେ ଏହା କହିଛନ୍ତି। ରାଜନାଥ ସିଂହ କହିଛନ୍ତି, ଯେତେବେଳେ କୌଣସି ଦେଶୀୟ ଜ୍ଞାନକୌଶଳରେ ଅସ୍ତ୍ରଶସ୍ତ୍ର ନିର୍ମାଣ କରାଯାଇ ପାରିବ ନାହିଁ ସେତେବେଳେ ସେଗୁଡ଼ିକର ଆମଦାନୀ କରାଯିବ।
ପ୍ରତିରକ୍ଷା ମନ୍ତ୍ରୀ କହିଛନ୍ତି, ଭାରତ ୨୦୨୫ ସୁଦ୍ଧା ଅସ୍ତ୍ରଶସ୍ତ୍ର ରପ୍ତାନୀ କ୍ଷେତ୍ରରେ ଏକ ସମ୍ମାନଜନକ ସ୍ଥାନ ଅଧିକାର କରିବ ଓ ଏହି ଲକ୍ଷ୍ୟ ହାସଲ ଦିଗରେ ମୁଖ୍ୟ ଭୂମିକା ଗ୍ରହଣ କରିବାକୁ ସେ ଭାରତ ଡାଇନାମିକ୍ସ ଲିମିଟେଡ୍କୁ କହିଛନ୍ତି। ଦେଶର ପ୍ରତିରକ୍ଷା ନୀତି ଆଞ୍ଚଳିକ, ମହାଦେଶୀୟ ଓ ଆନ୍ତର୍ଜାତିକ ସ୍ତରରେ ଶାନ୍ତି ଓ ସ୍ଥିରତା ପାଇଁ ଉଦ୍ଦିଷ୍ଟ ବୋଲି ସେ ଦୋହରାଇଛନ୍ତି। ସେ କହିଛନ୍ତି, ଭାରତକୁ ପାଞ୍ଚ ଲକ୍ଷ କୋଟି ଡଲାର ସମ୍ବଳିତ ଅର୍ଥନୀତିରେ ପରିଣତ କରିବାରେ ପ୍ରତିରକ୍ଷା କ୍ଷେତ୍ର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
