ବୈଦେଶିକ ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ଭାରତ ଗସ୍ତରେ ଆସିଥିବା ସାଉଦି ଆରବର ବୈଦେଶିକ ମନ୍ତ୍ରୀ ଫୈଜଲ୍ ବିନ୍ ଫର୍ହାନ୍ ଅଲ୍ ସଉଦ୍ ସହ ନୂଆଦିଲ୍ଲୀର ହାଇଦ୍ରାବାଦ୍ ହାଉସ୍ରେ ଆଜି ଆଲୋଚନା କରିଛନ୍ତି। କୋଭିଡ୍ ମହାମାରୀ ପରଠାରୁ ସାଉଦି ଆରବର ବୈଦେଶିକ ମନ୍ତ୍ରୀଙ୍କର ଏହା ପ୍ରଥମ ସରକାରୀ ଗସ୍ତ। ଉଭୟ ନେତା ଦ୍ୱି କ୍ଷୀୟ ସମ୍ପର୍କ ସମ୍ପର୍କିତ ସବୁ ବିଷୟ ସମେତ ଆପୋଷ ସ୍ୱାର୍ଥ ବିଜଡ଼ିତ ଆଞ୍ଚଳିକ ଓ ଅନ୍ତର୍ଜାତୀୟ ପ୍ରସଙ୍ଗ ଉପରେ ଆଲୋଚନା କରିଛନ୍ତି।
୨୦୧୯ ଅକ୍ଟୋବର ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାଉଦି ଆରବ ଯାଇଥିଲାବେଳେ ଦୁଇ ଦେଶ ମଧ୍ୟରେ ସ୍ୱାକ୍ଷରିତ ସାମରିକ ଭାଗିଦାରୀ ପରିଷଦ ରାଜିନାମାର ରୂପାୟନକୁ ମଧ୍ୟ ସେମାନେ ସମୀକ୍ଷା କରିଛନ୍ତି। ଏହି ରାଜିନାମା ଅଧୀନରେ ଅନୁଷ୍ଠିତ ବୈଠକଗୁଡ଼ିକ ଓ ପ୍ରଗତି ଉପରେ ଉଭୟ ନେତା ସନ୍ତୋଷ ବ୍ୟକ୍ତ କରିଛନ୍ତି। ଦୁଇ ଦେଶ ମଧ୍ୟରେ ବାଣିଜ୍ୟ, ପୁଞ୍ଜିନିବେଶ, ଶକ୍ତି, ପ୍ରତିରକ୍ଷା, ନିରାପତ୍ତା, ସଂସ୍କୃତି, ବାଣିଜ୍ୟ ଦୂତାବାସ ସଂକ୍ରାନ୍ତୀୟ ପ୍ରସଙ୍ଗ, ସ୍ୱାସ୍ଥ୍ୟ ଓ ମାନବ ସମ୍ବଳ ଆଦି କ୍ଷେତ୍ରରେ ଭାଗିଦାରୀ ସମ୍ପର୍କକୁ ଆହୁରି ମଜବୁତ୍ କରିବା ଲାଗି ପଦକ୍ଷେପଗୁଡ଼ିକ ଉପରେ ମଧ୍ୟ ସେମାନେ ଆଲୋଚନା କରିଛନ୍ତି।
A cordial and productive meeting with Saudi FM HH @Faisalbinfarhan.
Discussed our cooperation in the political, security and socio-cultural pillars of our strategic partnership.
Very useful exchange of views on Afghanistan, the Gulf and the Indo-Pacific. pic.twitter.com/0cYq6I5VUU
— Dr. S. Jaishankar (@DrSJaishankar) September 19, 2021
ଆଫଗାନିସ୍ତାନ ଓ ଅନ୍ୟାନ୍ୟ ଆଞ୍ଚଳିକ ପ୍ରସଙ୍ଗଗୁଡ଼ିକ ଉପରେ ଦୁଇ ନେତା ଆଲୋଚନା କରିଥିବାର ଜଣାପଡ଼ିଛି। ଉଭୟ ନେତାଙ୍କ ମଧ୍ୟରେ ଜାତିସଂଘ ଜି-୨୦ ରାଷ୍ଟ୍ରସମୂହ ଓ ଜି.ସି.ସି. ଭଳି ବହୁଦେଶୀୟ ସଙ୍ଗଠନଗୁଡ଼ିକରେ ଦ୍ୱିପକ୍ଷୀୟ ସହଯୋଗ ସଂକ୍ରାନ୍ତରେ ମଧ୍ୟ ସେମାନେ ଆଲୋଚନା କରିଛନ୍ତି। କୋଭିଡ୍ ମହାମାରୀ ସତ୍ତ୍ବେ ସାଉଦି ଆରବ ଗତବର୍ଷ ଜି-୨୦ ରାଷ୍ଟ୍ରସମୂହର ସଫଳ ଅଧ୍ୟକ୍ଷତା କରିଥିବାରୁ ଶ୍ରୀ ଜୟଶଙ୍କର ଅଭିନନ୍ଦନ ଜଣାଇଛନ୍ତି। କୋଭିଡ୍ ମହାମାରୀ ସମୟରେ ଭାରତୀୟମାନଙ୍କୁ ସାଉଦି ଆରବ ପକ୍ଷରୁ ଦିଆଯାଇଥିବା ସମର୍ଥନକୁ ମଧ୍ୟ ସେ ପ୍ରଶଂସା କରିଛନ୍ତି ଏବଂ ଭାରତରୁ ସାଉଦି ଆରବକୁ ଯାତ୍ରା ପାଇଁ କଟକଣାକୁ ଆହୁରି କୋହଳ କରିବା ଲାଗି ଶ୍ରୀ ଜୟଶଙ୍କର ଅଲ୍ ସଉଦ୍ଙ୍କୁ ଅନୁରୋଧ ଜଣାଇଛନ୍ତି।
