ଧାରା ୩୭୧ କେହି ଉଚ୍ଛେଦ କରି ପାରିବେ ନାହିଁ : ଅରୁଣାଚଳ ପ୍ରଦେଶରେ କହିଲେ ଶାହା

ଇଟାନଗର : ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା କହିଛନ୍ତି, କେହି ଧାରା ୩୭୧ର ଉଚ୍ଛେଦ କରି ପାରିବେ ନାହିଁ କିମ୍ବା ଏହା କରିବାକୁ ସରକାରଙ୍କର କୌଣସି ଉଦ୍ଦେଶ୍ୟ ନାହିଁ। ଅରୁଣାଚଳ ପ୍ରଦେଶର ଇଟାନଗରଠାରେ ରାଜ୍ୟର ୩୪ତମ ପ୍ରତିଷ୍ଠା ଦିବସ ପାଳନ ଅବସରରେ ଉଦ୍‍ବୋଧନ ଦେଇ ଶ୍ରୀ ଶାହା କହିଛନ୍ତି, ଗତବର୍ଷ ଅଗଷ୍ଟ ମାସରେ ଧାରା ୩୭୦ର ଉଚ୍ଛେଦ ସମୟରେ ଧାରା ୩୭୧କୁ ମଧ୍ୟ ଉଚ୍ଛେଦ କରିଦିଆଯିବ ବୋଲି ଗୁଜବ ପ୍ରଚାରିତ ହୋଇଥିଲା। ସେ କହିଛନ୍ତି, ଏଭଳି ଗୁଜବ ପ୍ରଚାର କରି ଯେଉଁମାନେ ଉତ୍ତରପୂର୍ବାଞ୍ଚଳ ଓ ଭାରତ ମଧ୍ୟରେ ମତପାର୍ଥକ୍ୟ ସୃଷ୍ଟି କରିବାକୁ ପ୍ରଚେଷ୍ଟା କରିଛନ୍ତି ତାହା କେବେ ସଫଳ ହେବ ନାହିଁ। ସେ କହିଛନ୍ତି, ଉତ୍ତର ପୂର୍ବାଞ୍ଚଳର ସାଂସ୍କୃତିକ ବିବିଧତା ବିନା ଭାରତ ଅସମ୍ପୂର୍ଣ୍ଣ। ଶ୍ରୀ ଶାହା କହିଛନ୍ତି, ସମଗ୍ର ଉତ୍ତରପୂର୍ବାଞ୍ଚଳକୁ ସମସ୍ୟା ମୁକ୍ତ କରିବା ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କର ଲକ୍ଷ୍ୟ। ସେ କହିଛନ୍ତି, ୨୦୧୪ ପୂର୍ବରୁ ଉତ୍ତର ପୂର୍ବାଞ୍ଚଳ ଭୌଗଳିକ ଦୃଷ୍ଟିରୁ ଯଦିଓ ଦେଶର ଏକ ଅଂଶ ଥିଲା କିନ୍ତୁ ପ୍ରଶାସନିକ ଦୃଷ୍ଟିକୋଣରୁ ଏହା ଅଲଗା ରହିଥିଲା। ସେ କହିଛନ୍ତି, ଶ୍ରୀ ମୋଦୀ ହେଉଛନ୍ତି ଦେଶର ଏକମାତ୍ର ପ୍ରଧାନମନ୍ତ୍ରୀ ଯିଏ ଗତ ପାଞ୍ଚ ବର୍ଷ ଭିତରେ ୩୦ଥର ଉତ୍ତରପୂର୍ବାଞ୍ଚଳକୁ ଗସ୍ତ କରିଛନ୍ତି।