ଭୁବନେଶ୍ବର: ସ୍ୱରଚିତ ସଂସ୍କୃତ କାବ୍ୟ ଗ୍ରନ୍ଥ ‘ସମୁଦ୍ର ଶତକମ୍’ରେ ସର୍ବାଧିକ ୫ଟି ଭାଷାର ଲିପି ବ୍ୟବହାର ସହ ସମୁଦ୍ର ବିଷୟରେ ସ୍ୱତନ୍ତ୍ର ଶତକ କାବ୍ୟ ରଚନା ପାଇଁ ବିଶିଷ୍ଟ ସଂସ୍କୃତ କବି ତଥା ଭୁବନେଶ୍ୱର ଭଞ୍ଜଭାରତୀର ସଭାପତି କୃଷ୍ଣକେଶବ ଷଡଙ୍ଗୀ ଇଣ୍ଡିଆ ବୁକ୍ ଅଫ୍ ରେକର୍ଡର ଅଧିକାରୀ ହୋଇଛନ୍ତି । ‘ସମୁଦ୍ର’ର ଦୃଶ୍ୟାବଳିରେ ଅନ୍ତର୍ନିହିତ ଥିବା ଗଭୀର-ଦର୍ଶନକୁ ଆଧାର କରି ଶ୍ରୀ ଷଡଙ୍ଗୀ ୨୦୨୦ମସିହାରେ ‘ସମୁଦ୍ର ଶତକମ୍’ ରଚନା କରିଥିଲେ।
ମୂଳତଃ ସଂସ୍କୃତ ଭାଷାରେ ରଚିତ ୧୦୧ ଶ୍ଲୋକ ସଂବଳିତ ଏହି କାବ୍ୟରେ ଶ୍ଲୋକ ଓ ଅର୍ଥ ଲିଖନରେ ସର୍ବାଧିକ ୫ଟି ଭାଷାର ଲିପି ଯଥାକ୍ରମେ- ସଂସ୍କୃତ, ଓଡିଆ, ହିନ୍ଦୀ, ଇଂଗ୍ରାଜୀ ଓ ରୋମାନ୍ ବ୍ୟବହାର କରିବା ସହ ଏପରି ଏକ ସ୍ୱତନ୍ତ୍ର କାବ୍ୟ ରଚନାର ବିରଳ କୃତିତ୍ୱ ପାଇଁ କୃଷ୍ଣକେଶବ ଷଡଙ୍ଗୀ ଏହି ରେକର୍ଡ ହାସଲ କରିଛନ୍ତି।
ପ୍ରକାଶଯୋଗ୍ୟ ଯେ କୃଷ୍ଣକେଶବ ଷଡଙ୍ଗୀ ନିରବଚ୍ଛିନ୍ନଭାବେ ଉଭୟ ଓଡିଆ ଭାଷା ଓ ସଂସ୍କୃତ ଭାଷାରେ ଲେଖନୀ ଚାଳନା କରି ଅଦ୍ୟାବଧି ୧୫ ଖଣ୍ଡ ପୁସ୍ତକର ପ୍ରକାଶନ କରିସାରିଛନ୍ତି। ଏହା ସହ ସେ ଭୁବନେଶ୍ୱର ଭଞ୍ଜ ଭାରତୀ ଅନୁଷ୍ଠାନ ମାଧ୍ୟମରେ ବିଗତ ଦୁଇ ଦଶନ୍ଧିରୁ ଅଧିକ କାଳ ଧରି ପ୍ରାଚୀନ ଓଡିଆ ସାହିତ୍ୟ, ସଂସ୍କୃତ ସାହିତ୍ୟ ଓ ଶ୍ରୀଜଗନ୍ନାଥ ଚେତନାର ପ୍ରଚାର-ପ୍ରସାର ସହ ଗବେଷଣାରେ ପ୍ରବୃତ୍ତ ଅଛନ୍ତି। ଜଣେ ଉଚ୍ଚକୋଟୀର ବାଗ୍ମୀଭାବରେ ବିଭିନ୍ନ ଗଣମାଧ୍ୟମ ଓ ସଭାସମିତିରେ କୃଷ୍ଣକେଶବ ଷଡଙ୍ଗୀ ଓଡିଶା ଓ ଓଡିଶା ବାହାରେ ବେଶ୍ ଲୋକପ୍ରିୟ।
ଏହି ରେକର୍ଡର କୃତିତ୍ୱର ଶ୍ରେୟ ସେ ମହାପ୍ରଭୁ ଶ୍ରୀଜଗନ୍ନାଥଙ୍କୁ ସମର୍ପିତ କରିବା ସଙ୍ଗେ ସଙ୍ଗେ ଦିବଂଗତ ପିତାମହ କର୍ମକାଣ୍ଡ ଭାସ୍କର ପଣ୍ଡିତ ରଘୁନାଥ ଷଡଙ୍ଗୀ, ପିତା ପ୍ରବକ୍ତାରତ୍ନ ସ୍ୱର୍ଗତ ପଣ୍ଡିତ ଜୟଦେବ ଷଡଙ୍ଗୀଙ୍କ ସ୍ମୃତିଚାରଣ ପୂର୍ବକ ସମସ୍ତ ଶୁଭେଚ୍ଛୁମାନଙ୍କ ଆଶୀର୍ବାଦ ଭିକ୍ଷା କରିଛନ୍ତି।
