ବାରହା ଶିକାର ବେଳେ ତିନି ଶିକାରୀ ଗିରଫ; ବନ୍ଧୁକ ଜବତ

ପାତ୍ରପୁର: ସାମନ୍ତିଆପଲ୍ଲୀ ରେଞ୍ଜ ତୁମ୍ବା ତିତିଗାଁ ନିକଟ ଜଙ୍ଗଲ ମଧ୍ୟରେ ବାରହା ଶିକାର ପାଇଁ ଗୋଡ଼ାଇ ଥିବା ବେଳେ ତିନିଜଣ ଶିକାରୀଙ୍କୁ ବନବିଭାଗ ପକ୍ଷରୁ ଗିରଫ କରି କୋର୍ଟ ଚାଲାଣ କରାଯାଇଛି। ଏହି ତିନି ଜଣ ହେଉଛନ୍ତି ଖଣ୍ଡ ଦେଉଳି ଗ୍ରାମର ମହେଶ୍ବର ନାୟକ(୧୮), ଲଳିତ ଦଳେଇ(୨୭) ଏବଂ ମୋହନା ଥାନା ମାଣିକପୁର ଗ୍ରାମର କୁମୁଡ଼ା ଦଳେଇ(୨୫) ବୋଲି ଜଣାପଡ଼ିଛି। ତୁମ୍ବା ଅଞ୍ଚଳରେ କିଛି ଶିକାରୀ ବାରହା ଶିକାର ପାଇଁ ଏକତ୍ରିତ ହୋଇଥିବା ଖବର ପାଇ ବନବିଭାଗ ଚଢ଼ାଉ କରିଥିଲେ। ଏହି ସମୟରେ କିଛି ବ୍ୟକ୍ତି ଏକ ବାରହାକୁ ଶିକାର କରିବାକୁ ଗୋଡାଉଥିବା ବେଳେ ବନବିଭାଗ ତିନି ଜଣଙ୍କୁ କାବୁ କରିଥିଲେ। ତାଙ୍କଠାରୁ ଏକ ଗୁଳିଭରା ଦେଶୀ ବନ୍ଧୁକ ଜବତ କରାଯାଇଛି। ଚଢ଼ାଉ ବେଳେ ତୁମ୍ବା ଫରେଷ୍ଟର କାମନା ଭୂୟାଁ, ରତନ କୁମାର ବେହେରା, ପର୍ଶୁରାମ କାର୍ଜି, ସାରଥୀ କାର୍ଜି, ବାଇରି କାର୍ଜି ପ୍ରମୁଖ ସାମିଲ ଥିଲେ।

Comments are closed.