ସିମଳା : ହିମାଚଳ ପ୍ରଦେଶରେ ଚାଲିଥିବା ବର୍ଷାର ପ୍ରକୋପ ଥମିବାର ନାଁ ନେଉନଥିବାବେଳେ ସାଧାରଣ ଜୀବନଯାତ୍ରା ବାଧାପ୍ରାପ୍ତ ହେବାରେ ଲାଗିଛି। ଏଥିରେ ୭୯ ଜଣଙ୍କର ମୃତ୍ୟୁ ହୋଇଥିବାବେଳେ ୫୫ ଜଣ ନିଖୋଜ ଅଛନ୍ତି। ଏହାବ୍ୟତୀତ ଲକ୍ଷାଧିକ ଲୋକ ପ୍ରଭାବିତ ହୋଇଛନ୍ତି। ଆକସ୍ମିକ ବନ୍ୟା, ଭୂସ୍ଖଳନ ଏବଂ ବାଦଲଫଟା ବର୍ଷା ଯୋଗୁଁ ରାଜ୍ୟର ୮୭ଟି ସଡକ ଅବରୋଧ ହୋଇପଡିଛି। ଏଗୁଡିକ ମଧ୍ୟରେ କୁଲ୍ଲୁ ଜିଲାରେ ୩୦, ମଣ୍ଡିରେ ୨୫, ଲାହାଉଲରେ ୧୪, ସିମଳାରେ ୯, କାଙ୍ଗ୍ରାରେ ୭ ଏବଂ କିନ୍ନଉର ଜିଲାରେ ୨ଟି ସଡକ ଅନ୍ତର୍ଭୁକ୍ତ। ଏହି ପରିପ୍ରେକ୍ଷୀରେ ରାଜ୍ୟ ପରିବହନ ବିଭାଗ ପକ୍ଷରୁ ୮୨ ରୁଟ୍ରେ ବସ୍ ଚଳାଚଳକୁ ବାତିଲ କରାଯାଇଛି। ପ୍ରବଳ ବର୍ଷା ସମ୍ଭାବନା ଥିବାରୁ ଭାରତୀୟ ପାଣିପାଗ କାର୍ଯ୍ୟାଳୟ (ଆଇଏମଡି) ପକ୍ଷରୁ ଆସନ୍ତା ୮ ପର୍ଯ୍ୟନ୍ତ ୟେଲୋ ଆଲର୍ଟ ଜାରି କରାଯାଇଛି। ରାଜ୍ୟ ଜରୁରୀକାଳୀନ ନିୟନ୍ତ୍ରଣ କକ୍ଷରୁ ମିଳିଥିବା ସୂଚନା ଅନୁଯାୟୀ ବର୍ଷା ଓ ଭୂସ୍ଖଳନରେ ୪୧ଟି ଟ୍ରାନ୍ସଫର୍ମର ଏବଂ ୬୬ଟି ଜଳଯୋଗାଣ ପ୍ରକଳ୍ପ ଅକାମୀ ହୋଇପଡିଛି। ଶୁକ୍ରବାର ସନ୍ଧ୍ୟାରୁ ରାଜ୍ୟର ବିଭିନ୍ନ ସ୍ଥାନରେ ମଧ୍ୟମରୁ ପ୍ରବଳ ବର୍ଷା ଲାଗି ରହିଛି। ଯୋଗୀନ୍ଦର ନଗରରେ ସର୍ବାଧିକ ୮୫ ମିଲିମିଟର ବର୍ଷା ରେକର୍ଡ କରାଯାଇଥିବାବେଳେ ଗୋହରରେ ୮୦, ଶିଲାରୁରେ ୭୬.୪, ପୋଆନ୍ତା ସାହିବରେ ୬୭.୨, ପାଲମପୁରରେ ୫୭.୨, ଧର୍ମଶାଳାରେ ୫୬.୨ ଏବଂ ହମିରପୁରରେ ୫୪ ମିଲିମିଟର ବର୍ଷା ରେକର୍ଡ କରାଯାଇଛି। ଏପର୍ଯ୍ୟନ୍ତ ବର୍ଷା ଯୋଗୁଁ ରାଜ୍ୟରେ ୭୦୦ କୋଟି ଟଙ୍କାର କ୍ଷତି ଘଟିଛି ବୋଲି ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ ରବିବାର ଗଣମାଧ୍ୟମକୁ ସୂଚନା ଦେଇଛନ୍ତି। ଉଦ୍ଧାର କାର୍ଯ୍ୟରେ ସେନା, ଏନଡିଆରଏଫ୍, ଏସଡିଆରଏଫ୍, ହୋମଗାର୍ଡ ଏବଂ ସିଆଇଏସଏଫ ଯବାନଙ୍କୁ ମୁତୟନ କରାଯାଇଛି।
Comments are closed.