କଟକ: କଟକ ଏସସିବି ମେଡିକାଲ କଲେଜରୁ କୁଖ୍ୟାତ ଗ୍ୟାଙ୍ଗଷ୍ଟର ସେଖ୍ ହାଇଦର ଫେରାର ହୋଇଯିବା ପରେ ପୁଲିସର ଚେତା ପଶିଛି। ପୁଲିସ ବିଭାଗ ଏବେ ତତ୍ପର ହୋଇ ହାଇଦରକୁ ଖୋଜିବାରେ ଲାଗିଛି। ରାଜ୍ୟ ବାହାରକୁ ଯେପରି ହାଇଦର ଖସି ନ ଯିବ ସେଥିଲାଗି ସୀମାନ୍ତବର୍ତ୍ତୀ ଅଞ୍ଚଳରେ ଯାଞ୍ଚ କଡ଼ାକଡ଼ି କରାଯାଇଛି। ସୀମାନ୍ତ ଦେଇ ଯାତାୟାତ କରୁଥିବା ଟ୍ରେନ ଓ ଅନ୍ୟାନ୍ୟ ଯାନବାହନକୁ ଯାଞ୍ଚ କରାଯାଉଛି। ହାଇଦରକୁ ଧରିବା ଲାଗି ୫ରୁ ୬ଟି ଟିମ୍ ଗଠନ କରାଯାଇଥିବା କ୍ରାଇମବ୍ରାଞ୍ଚ ଏଡିଜିଙ୍କଠାରୁ ସୂଚନା ମିଳିଛି।
ହାଇଦରକୁ ଧରିବା ଲାଗି ଡିଜିପିଙ୍କ ନେତୃତ୍ବରେ ରବିବାର ଏକ ଉଚ୍ଚସ୍ତରୀୟ ବୈଠକ ବସିଥିଲା। ବୈଠକ ପରେ କ୍ରାଇମବ୍ରାଞ୍ଚ ଏଡିଜି ଗଣମାଧ୍ୟମକୁ ସୂଚନା ଦେଇ କହିଛନ୍ତି। ହାଇଦରକୁ ଧରିବା ଲାଗି ସମସ୍ତ ସୀମାନ୍ତବର୍ତ୍ତୀ ଅଞ୍ଚଳରେ ନଜର ରଖାଯାଇଛି। ସବୁ ଜିଲାର ଏସପିଙ୍କୁ ଆଲର୍ଟ ରହିବାକୁ ନିର୍ଦେଶ ଦିଆଯାଇଛି। ଏସଟିଏଫ ୟୁନିଟ୍ ଓ ଡିସିପିଙ୍କୁ ମଧ୍ୟ ଆଲର୍ଟ କରାଯାଇଛି। ଷ୍ଟେଶନ ଓ ପ୍ରମୁଖ ସଡ଼କ ପଥ ଉପରେ ନଜର ରଖାଯାଇଛି। ବିଭିନ୍ନ ସ୍ଥାନର ସିସିଟିଭି ଫୁଟେଜ ଯାଞ୍ଚ କରାଯାଉଛି। ଖୁବଶୀଘ୍ର ହାଇଦରକୁ ଧରାଯିବ ବୋଲି ଏଡିଜି କହିଛନ୍ତି।
ସୂଚନାଯୋଗ୍ୟ, ହାଇଦରର କିଛି ସହଯୋଗୀ ଏସସିବି ମେଡିକାଲରେ ମୁତୟନ ହୋଇଥିବା ସୁରକ୍ଷାକର୍ମୀଙ୍କୁ ନିଶା ଦେଇ ତା’କୁ ଫେରାର କରାଇ ଦେଇଥିବା ଜଣାପଡ଼ିଛି। ଏହା ପରେ ହାଇଦରକୁ ଖୋଜିବା ଲାଗି ପୁଲିସ ବିଭାଗ ତନାଘନା ଜାରି ରଖିଛି।
Comments are closed.