କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକସ୍ଥିତ ହନୁମାନ ଓ ଦୁର୍ଗା ମନ୍ଦିରରେ ପବିତ୍ର ହନୁମାନ ଜୟନ୍ତୀ, ଓଡ଼ିଆ ନବବର୍ଷ ଓ ମହାବିଷୁବ ପଣା ସଂକ୍ରାନ୍ତି ମହାସମାରୋହରେ ପାଳନ କରାଯାଇଛି । ହନୁମାନ ମନ୍ଦିର ବ୍ୟତୀତ ଏଠାରେ ଥିବା ସମସ୍ତ ଶିବମନ୍ଦିର, ଜଗନ୍ନାଥ ମନ୍ଦିର, ରାମ ମନ୍ଦିର ଓ ସମସ୍ତ ଦେବୀ ପୀଠରେ ସ୍ବତନ୍ତ୍ର ଉତ୍ସବ ସାଙ୍ଗକୁ ରୀତିନୀତି ଅନୁସାରେ ପୂଜାପାଠ କରାଯାଇଛି । ଏହି ଅବସରରେ ହନୁମାନ ମନ୍ଦିରରେ ପୂଜକ ରୀତିନୀତି ଅନୁଯାୟୀ ପୂଜା ପାଠ ସହ ହୋମଯଜ୍ଞ, ହନୁମାନ ଚାଳିସା ପାଠ କରିଥିଲେ । ଭକ୍ତମାନେ ଆଜି ସବୁ ମନ୍ଦିର ବୁଲିବା ସହ ଦେବାଦେବୀଙ୍କୁ ଦର୍ଶନ କରିଥିବା ଦେଖିବାକୁ ମିଳିଛି । ପଣା ସଂକ୍ରାନ୍ତି ଅବସରରେ ବିଭିନ୍ନ ମନ୍ଦିରରେ କମିଟି ତରଫରୁ ମନ୍ଦିରରେ ପଣା ଭୋଗ ଲାଗି କରାଯାଇଛି । ଏହି ପଣାରେ ପାଚିଲା ବେଲ, ଗୂଡ଼, ଚିନି, ଛେନା, କଦଳୀ, ଆମ୍ବ, ନଡ଼ିଆ, ଦହି, ବିଭିନ୍ନ ପ୍ରକାର ପାଚିଲା ଫଳ ମିଶାଇ ସୁସ୍ଵାଦ ପଣା ପ୍ରସ୍ତୁତ କରି ରୀତିନୀତି ଅନୁଯାୟୀ ପୂଜା କରିବା ପରେ ଆସିଥିବା ସମସ୍ତ ଭକ୍ତଙ୍କୁ ବଣ୍ଟନ କରିଥିଲେ । ଆଜି ପବିତ୍ର ଓଡ଼ିଆ ନବବର୍ଷରେ ଓଡ଼ିଆ ପଞ୍ଜିକା ପୂଜକଙ୍କ ଦ୍ୱାରା ଶୁଭାରମ୍ଭ କରିଥିଲେ । ଏହି ଅବସରରେ ପ୍ରତ୍ୟେକ ଓଡ଼ିଆ ଘରମାନଙ୍କରେ ଦାଣ୍ଡ ଅଗଣାରେ ରଙ୍ଗବେରଙ୍ଗର ମୁରୁଜରେ ଝୋଟି ଆଙ୍କି ନୂତନ ବର୍ଷକୁ ସ୍ୱାଗତ କରିବା ସହ ଘରମାନଙ୍କରେ ମଧ୍ୟ୍ ପଣା କରି ଭୋଗ କରିଥିବା ଦେଖିବାକୁ ମିଳିଛି। ଦୁଇ ବର୍ଷ କରୋନା ମହାମାରୀ ଯୋଗୁଁ ସମସ୍ତ ପ୍ରକାର କାର୍ଯ୍ୟ ବନ୍ଦ ରହିଥିଲା । ତାହା ବର୍ତ୍ତମାନ କମିଥିବା ଯୋଗୁଁ ସରକାର କଟକଣା କୋହଳ କରିବା ପରେ ସମସ୍ତ ମନ୍ଦିରରେ ଧୁମଧାମରେ ପୂଜା ପାଠ କରାଯାଉଛି ।
Comments are closed.