ମୁମ୍ବଇ : ଭାଲେନଟାଇନ୍ସ ଡେ’ ଅବସରରେ ମୁକ୍ତିଲାଭ କରିଥିବା ରଣବୀର ସିଂହ ଓ ଆଲିୟା ଭଟ୍ଟଙ୍କ ଅଭିନୀତ ଚଳଚ୍ଚିତ୍ର ‘ଗଲି ବୟ’ ବକ୍ସ ଅଫିସରେ ପ୍ରଥମ ଦିନରୁ ଉଲ୍ଲେଖନୀୟ ବ୍ୟବସାୟ କରିଛି। ସୂଚନା ଅନୁସାରେ, ଚଳଚ୍ଚିତ୍ରଟି ପ୍ରଥମ ଦିନରେ ୧୯.୪୦ କୋଟି ଟଙ୍କା ଆୟ କରିଛି। ସେହିପରି ଦ୍ୱିତୀୟ ଦିନରେ ଚଳଚ୍ଚିତ୍ର ୧୬ କୋଟି ଟଙ୍କା ଆୟ କରିଛି। ମୁକ୍ତିଲାଭର ପ୍ରଥମ ଦିନରେ ହିଁ ଚଳଚ୍ଚିତ୍ର ଦୁଇଟି ରେକର୍ଡ଼ ହାସଲ କରିଛି। ପ୍ରଥମଟି ହେଉଛି, ୨୦୧୯ରେ ବର୍ତ୍ତମାନ ସୁଦ୍ଧା ପ୍ରଥମ ଦିନରେ ସବୁଠାରୁ ଅଧିକ ଆୟ କରିଥିବା ଚଳଚ୍ଚିତ୍ର ପାଲଟିଛି। ସେହିପରି ଅନ୍ୟଟି ହେଉଛି, ରଣବୀରଙ୍କ କ୍ୟାରିୟରରେ ପ୍ରଥମ ଦିନରେ ସବୁଠାରୁ ଅଧିକ ଆୟ କରିଥିବା ଏହା ଦ୍ୱିତୀୟ ଚଳଚ୍ଚିତ୍ର।
ଉଲ୍ଲେଖଯୋଗ୍ୟ, ଜୋୟା ଅଖ୍ତର୍ ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି। ଏଥିରେ ରଣବୀର ଓ ଆଲିୟାଙ୍କ ବ୍ୟତୀତ ସିଦ୍ଧାନ୍ତ ଚତୁର୍ବେଦୀ ମଧ୍ୟ ଗୁୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ‘ଗଲି ବୟ’ ୩୩୫୦ ପରଦାରେ ମୁକ୍ତିଲାଭ କରିଛି। ସେହପରି ବିଶ୍ୱବ୍ୟାପୀ ଏହା ୪୧୦୧ ପରଦାରେ ମୁକ୍ତିଲାଭ କରିଛି। ଫରହାନ ଅଖ୍ତର୍, ରିତେଶ ସିଧୱାନୀ ଓ ଏକ୍ସଲ୍ ଏଣ୍ଟରଟେନମେଣ୍ଟର ପ୍ରଯୋଜନାରେ ଚଳଚ୍ଚିତ୍ରଟି ନିର୍ମାଣ କରାଯାଇଛି।
