ନୂଆଦିଲ୍ଲୀ : କେନ୍ଦ୍ର ସରକାର ୧୨ଟି ରାଷ୍ଟ୍ରାୟତ୍ତ ବ୍ୟାଙ୍କ ପାଇଁ ୪୮ ହଜାର ୨୩୯ କୋଟି ଟଙ୍କା ମଞ୍ଜୁର କରିଛନ୍ତି। ଏହି ବ୍ୟାଙ୍କ୍ଗୁଡ଼ିକର ପୁଞ୍ଜି ଆବଶ୍ୟକତାକୁ ପୂରଣ କରିବା ଓ ସେମାନଙ୍କର ଆର୍ଥିକ ବିକାଶ ପାଇଁ ଏହି ଅର୍ଥ ଦିଆଯିବ। ଏକ ଟ୍ୱିଟ୍ କରି ଆର୍ଥିକ ସେବା ସଚିବ ରାଜୀବ୍ କୁମାର ଏହା କହିଛନ୍ତି।
ସରକାର କର୍ପୋରେସନ୍ ବ୍ୟାଙ୍କ୍କୁ ୯ ହଜାର କୋଟି ଟଙ୍କା ଓ ଆହ୍ଲାବାଦ ବ୍ୟାଙ୍କ୍କୁ ୬ ହଜାର ୮୯୬ କୋଟି ଟଙ୍କା ପ୍ରଦାନ କରିବେ । ରିଜର୍ଭ ବ୍ୟାଙ୍କ୍ର ଦ୍ରୁତ ସଂଶୋଧନ ମୂଳକ ପଦକ୍ଷେପ ଅଧୀନରେ ଏହି ବ୍ୟାଙ୍କ୍ ଗୁଡ଼ିକ ଭଲ ପ୍ରଦର୍ଶନ କରୁଥିବା ବ୍ୟାଙ୍କ୍ ଶ୍ରେଣୀରେ ଆସୁଛନ୍ତି । ସେହିପରି ବ୍ୟାଙ୍କ୍ ଅଫ୍ ଇଣ୍ଡିଆକୁ ୬୩୮ କୋଟି ଟଙ୍କା ଓ ବ୍ୟାଙ୍କ୍ ଅଫ୍ ମହାରାଷ୍ଟ୍ରକୁ ୨୦୫ କୋଟି ଟଙ୍କା ଦିଆଯିବ । ଏହି ଦୁଇ ବ୍ୟାଙ୍କ୍ କିଛିଦିନ ପୂର୍ବେ ନିୟନ୍ତ୍ରଣ ତଦାରଖ ଢାଞ୍ଚାର ପରିସର ବାହାରକୁ ଆସିଥିଲେ। ରାଜୀବ୍ କୁମାର କହିଛନ୍ତି, ପଞ୍ଜାବ ନ୍ୟାସନାଲ୍ ବ୍ୟାଙ୍କ୍କୁ ୫ ହଜାର ୯୦୦ କୋଟି ଟଙ୍କା ଦିଆଯିବାକୁ ଥିବାବେଳେ ୟୁନିୟନ୍ ବ୍ୟାଙ୍କ୍କୁ ୪ ହଜାର ୧୧୨ କୋଟି ଟଙ୍କା, ଆନ୍ଧ୍ରା ବ୍ୟାଙ୍କ୍କୁ ୩ ହଜାର ୨୫୬ କୋଟି ଟଙ୍କା ଓ ସିଣ୍ଡିକେଟ୍ ବ୍ୟାଙ୍କ୍କୁ ୧୬୦୦ କୋଟି ଟଙ୍କା ଦିଆଯିବ। ସେହିପରି ସରକାର ସେଣ୍ଟ୍ରାଲ ବ୍ୟାଙ୍କ୍ ଅଫ୍ ଇଣ୍ଡିଆ, ୟୁନାଇଟେଡ୍ ବ୍ୟାଙ୍କ୍, ୟୁକୋ ବ୍ୟାଙ୍କ୍ ଓ ଇଣ୍ଡିଆନ୍ ଓଭର୍ସିଜ୍ ବ୍ୟାଙ୍କ୍କୁ ୧୨ ହଜାର ୫୩୫ କୋଟି ଟଙ୍କା ଦିଆଯିବ ବୋଲି ଜଣାପଡିଛି।
ଏହି ବ୍ୟାଙ୍କ୍ଗୁଡ଼ିକୁ ପୁଞ୍ଜିଯୋଗାଣ ଦ୍ବାରା ସେମାନଙ୍କର କାର୍ଯ୍ୟ ସମ୍ପାଦନାରେ ଉନ୍ନତି ଘଟିବ ବୋଲି ସେ କହିଛନ୍ତି ।
