ଧାରା ୩୭୦ ଉଚ୍ଛେଦକୁ ନେଇ ହଡ଼ବଡ଼ରେ ପାକିସ୍ତାନ, ଦିଲ୍ଲୀରୁ ଉଚ୍ଚାୟୁକ୍ତଙ୍କୁ ନେଇପାରେ ଫେରାଇ !

ନୂଆଦିଲ୍ଲୀ : ଧାରା ୩୭୦ ଉଚ୍ଛେଦ ପରେ ପାକିସ୍ତାନ ହଡ଼ବଡ଼େଇ ଯାଇଛି। ଭାରତର ଏହି ପଦକ୍ଷେପ ବିରୋଧରେ ପାକିସ୍ତାନ କିଛି ବଡ଼ ପଦକ୍ଷେପ ନେବାକୁ ଚିନ୍ତା କରୁଛି। କୁହାଯାଉଛି ଯେ ପାକିସ୍ତାନ ଭାରତରୁ ନିଜ ଉଚ୍ଚାୟୁକ୍ତଙ୍କୁ ଫେରାଇ ନେଇପାରେ। ପାକିସ୍ତାନ ଜିୟୋ ନ୍ୟୁଜ ସମ୍ପାଦକ ହାମିଦ ମୀର ଟ୍ୱିଟ୍‍ କରି ଏହି ସୂଚନା ଦେଇଛନ୍ତି।

ପାକିସ୍ତାନ ନିକଟରେ ଭାରତ ପାଇଁ ଉଚ୍ଚାୟୁକ୍ତ ନିଯୁକ୍ତ କରିଛି। ସେ ଅଗଷ୍ଟ ୧୬ରେ ଭାରତ ଆସି ପଦଭାର ଗ୍ରହଣ କରିଥାନ୍ତେ। ସେ ଏବେ ପାକିସ୍ତାନରେ ଥିଲାବେଳେ କାର୍ଯ୍ୟକାରୀ ଉଚ୍ଚାୟୁକ୍ତ ଭାରତରେ ଦାୟିତ୍ୱ ତୁଲାଉଉଛନ୍ତି। ଜାମ୍ମୁ କାଶ୍ମୀରରେ ଧାରା ୩୭୦ ଉଚ୍ଛେଦ ପ୍ରସଙ୍ଗରେ ଆଲୋଚନା ପାଇଁ ପାକିସ୍ତାନ ସେନା ମୁଖ୍ୟ ଜେନେରାଲ କମର ଜାଭେଦ ବାଜୱା ମଙ୍ଗଳବାର ଫୋର୍ସ କମାଣ୍ଡର ବୈଠକ ଡାକିଥିଲେ। ଏହି ପ୍ରସଙ୍ଗକୁ ନେଇ ପାକିସ୍ତାନ ସଂସଦର ମିଳିତ ଅଧିବେଶନ ଡକାଯାଇଥିଲା। ଏହି ଅଧିବେଶନରେ ହୋହଲ୍ଲା ହୋଇଥିଲା। ବିରୋଧୀ ଦଳର ନେତାମାନେ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଅନୁପସ୍ଥିତିକୁ ନେଇ ପ୍ରଶ୍ନ କରିଥିଲେ। ପରେ ଇମ୍ରାନ ଖାନ ସଂସଦରେ ପହଞ୍ଚି ନିଜ ମତ ରଖିଥିଲେ।