ନୂଆଦିଲ୍ଲୀ : ସଂସଦର ସ୍ୱତନ୍ତ୍ର ଅଧିବେଶନ କାଳରେ ମହିଳା ସ୍ଥାନ ସଂରକ୍ଷଣ ବିଧେୟକ ପାରିତ କରିବାକୁ ବିଜୁ ଜନତା ଦଳ ଦାବି କରିଛି। ଅଧିବେଶନ ପୂର୍ବରୁ ଆହୂତ ସର୍ବଦଳୀୟ ବୈଠକରେ ବିଜେଡିର ଲୋକସଭା ନେତା ପିନାକୀ ମିଶ୍ର କହିଥିଲେ ଯେ ନୂଆ ସଂସଦ ସୌଧରେ ଭାରତୀୟ ଗଣତନ୍ତ୍ରର ନୂତନ ଯୁଗ ଆରମ୍ଭ ହେବା ଆବଶ୍ୟକ। ବର୍ତ୍ତମାନ ସଂସଦରେ ପ୍ରତି ୬୦ ଜଣ ପୁରୁଷ ସାଂସଦଙ୍କ ତୁଳନାରେ ମାତ୍ର ୪ ଜଣ ମହିଳା ସାଂସଦ ଅଛନ୍ତି ଯାହା ଅତ୍ୟନ୍ତ ଦୁଃଖଦାୟକ ଏବଂ ଲଜ୍ୟାଜନକ। ସମାଜର ୫୦ ପ୍ରତିଶତ ଅଂଶ ମହିଳା ସମାଜକୁ ନ୍ୟାୟ ପ୍ରଦାନ ପାଇଁ ସରକାର ମହିଳା ସ୍ଥାନ ସଂରକ୍ଷଣ ବିଧେୟକ ପାରିତ କରିବାକୁ ଆହ୍ୱାନ କରିଥିଲେ। ମହିଳାଙ୍କ ପାଇଁ ସ୍ଥାନ ସଂରକ୍ଷଣ ସମୟର ଆବଶ୍ୟକତା ଦର୍ଶାଇ ବିଜେଡି ଏହି ପ୍ରସଙ୍ଗରେ ସରକାରଙ୍କୁ ସମର୍ଥନ କରିବ ବୋଲି ସାଂସଦ ଶ୍ରୀ ମିଶ୍ର କହିଥିଲେ। ବୈଠକରେ ବିଜେଡିର ରାଜ୍ୟସଭା ନେତା ଡ଼ ସସ୍ମିତ ପାତ୍ର ଉପସ୍ଥିତ ଥିଲେ। ସ୍ୱତନ୍ତ୍ର ଅଧିବେଶନରେ ବିଜେଡି ସମେତ ବିଆରଏସ ଏବଂ ଅନ୍ୟାନ୍ୟ ରାଜନୈତିକ ଦଳ ମହିଳା ସ୍ଥାନ ସଂରକ୍ଷଣ ବିଧେୟକ ପାରିତ କରିବାକୁ ଦାବି କରିଛନ୍ତି।
Comments are closed.