ଡେସ୍କ: ସରକାର ୩୪ ହଜାର କୋଟିରୁ ଅଧିକ ଟଙ୍କା ବ୍ୟୟରେ ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନକୁ ଅନୁମୋଦନ କରିଛନ୍ତି। ସବୁଜ ଜ୍ଞାନକୌଶଳକୁ ପ୍ରୋତ୍ସାହନ ଦେବା ପାଇଁ ଜରୁରୀ ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦ ପାଇଁ ଏକ ସ୍ଥିର ମୂଲ୍ୟ ଶୃଙ୍ଖଳା ନିର୍ମାଣ କରିବାକୁ ନିଷ୍ପତ୍ତି ନିଆଯାଇଛି। ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ ଆଜି ନୂଆଦିଲ୍ଲୀରେ ଗଣମାଧ୍ୟମକୁ ସୂଚନା ଦେଇ ଅର୍ଥନୀତିର ବିକାଶ ପାଇଁ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଗୁରୁତ୍ୱ ଉପରେ ଆଲୋକପାତ କରିଥିଲେ। ଶକ୍ତି ପରିବର୍ତ୍ତନ, କୃଷି, ପ୍ରତିରକ୍ଷା, ଇଲେକ୍ଟ୍ରୋନିକ୍ସ, ଟେଲି ଯୋଗାଯୋଗ, ପରିବହନ, ଏରୋସ୍ପେସ୍, ପରମାଣୁ ଏବଂ ଅନ୍ୟାନ୍ୟ କ୍ଷେତ୍ରପାଇଁ ଗୁରୁତ୍ୱପୂର୍ଣ୍ଣ ଖଣିଜ ଜ୍ଞାନକୌଶଳ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି। ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଅନୁସନ୍ଧାନ, ଗୁରୁତ୍ୱପୂର୍ଣ୍ଣ ଖଣିଜ ବ୍ଲକ ଅଧିଗ୍ରହଣ ଏବଂ ଖଣିଜ ପଦାର୍ଥ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବା ଉଦ୍ଦେଶ୍ୟରେ ଏହି ମିଶନକୁ ଅନୁମୋଦନ ମିଳିଛି।
ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନକୁ କ୍ୟାବିନେଟ ମଞ୍ଜୁରୀ, ଖର୍ଚ୍ଚ ହେବ ୩୪ ହଜାର କୋଟିରୁ ଅଧିକ pic.twitter.com/2nS60k0oPb
— Samaja Live (@samajalive) January 29, 2025
ଆଖୁ ଫିଡଷ୍ଟକରୁ ଇଥାନଲ କିଣିବା ପାଇଁ ମଧ୍ୟ ସରକାର ମୂଲ୍ୟକୁ ଅନୁମୋଦନ କରିଛନ୍ତି। ଆଖୁ ଫିଡଷ୍ଟକରେ ସି-ହେଭି ଗୁଡ଼, ବି-ହେଭି ଗୁଡ଼ ଏବଂ ଆଖୁ ରସ, ଚିନି ଏବଂ ଚିନି ସିରପ୍ ଅନ୍ତର୍ଭୁକ୍ତ। ସି-ହେଭି ଗୁଡ଼ ଲିଟର ପିଛା ୫୭ ଟଙ୍କା ୯୭ ପଇସା, ବି-ହେଭି ଗୁଡ଼ ଲିଟର ପିଛା ୬୦ ଟଙ୍କା ୭୩ ପଇସା ଏବଂ ଆଖୁ ରସ, ଚିନି ଓ ଚିନି ସିରପ ଲିଟର ପିଛା ୬୫ ଟଙ୍କା ୬୧ ପଇସା କୁ କ୍ୟାବିନେଟ୍ ଅନୁମୋଦନ କରିଛି। ମନ୍ତ୍ରୀ କହିଛନ୍ତି ଯେ ଇଥାନଲ ମିଶ୍ରଣ ଦେଶର ଅର୍ଥନୀତିକୁ ସାହାଯ୍ୟ କରିଛି, ଯାହା ଫଳରେ ଏକ ଲକ୍ଷ ତେର ହଜାର କୋଟି ଟଙ୍କାର ବୈଦେଶିକ ମୁଦ୍ରା ସଞ୍ଚୟ ହୋଇଛି। ସେ କହିଛନ୍ତି ଯେ ଇଥାନଲ ମିଶ୍ରଣ କାର୍ଯ୍ୟକ୍ରମ ଦ୍ୱାରା କୃଷକମାନେ ମଧ୍ୟ ଉପକୃତ ହୋଇଛନ୍ତି ଏବଂ ଗତ ଇଥାନଲ ଯୋଗାଣ ବର୍ଷରେ କୃଷକମାନଙ୍କୁ ଚାଳିଶ ହଜାର କୋଟିରୁ ଅଧିକ ଟଙ୍କା ପ୍ରଦାନ କରାଯାଇଛି।
