ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ, ଜଣେ ମୃତ

ଗୋପାଳପୁର: ଗୋଳନ୍ଥରା ଥାନା ଅନ୍ତର୍ଗତ ସୁନାପୁର ବେଳାଭୂମି ରେ ବଣଭୋଜି କରିବାକୁ ଆସିଥିବା ଦୁଇ ଗୋଷ୍ଠୀ ମଧ୍ୟରେ କଥା  କଟାକଟି ହେବା ପରେ ବାଦି ଛକ ଠାରେ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଘଟି ଜଣଙ୍କର ମୃତ୍ୟୁ ଘଟିଥିବା ବେଳେ ୩ ରୁ ଉର୍ଦ୍ଧ୍ବ ଆହାତ ହୋଇଥିବା ଜଣାପଡିଛି। ମୃତକ ଜଣକ  ପଡୋଶୀ ଆନ୍ଧ୍ରପ୍ରଦେଶର ଇଚ୍ଛାପୁର ଥାନା ଅଧିନସ୍ଥ କେଦାରପୁର ଗ୍ରାମର ଏ ବାଲୁ ରେଡି ବୋଲି  ପୁଲିସ ସୂଚନା ଦେଇଛି।

ଅଭିଯୋଗ ଅନୁଯାୟୀ ଆଜି ସକାଳେ କେଦାର ପୁର ଗ୍ରାମର ୨୦ ଜଣରୁ ଉର୍ଦ୍ଧ୍ବ  ଯୁବକ ସୁନାପୁର ବେଳାଭୂମିକୁ ବଣ ଭୋଜି  କରିବାକୁ ଯାଇଥିଲେ।  ସେଠାରେ ଇଚ୍ଛାପୁର ବେଲପଡାର କିଛି ଯୁବକ ମଧ୍ୟ ବଣଭୋଜି କରୁଥିଲେ। ଅପରାହ୍ନ ପ୍ରାୟ  ୩ ଟା ବେଳେ ଉଭୟ ଗୋଷ୍ଠି ମଧ୍ୟ୍ୟରେ କୈାଣସି କଥାକୁ ନେଇ ବଚସା ହୋଇଥିଲା। ବଣ ଭୋଜି ସାରି ସନ୍ଧ୍ୟାରେ ମୃତକ ବାଲୁ ସମେତ ଅନ୍ୟ ମାନେ ଗ୍ରାମ କୁ ଫେରୁଥିବା ବେଳେ ବାଦି ଛକ ନିକଟରେ ଅନ୍ୟ ଗୋଷ୍ଠି ଯୁବକ ମାନେ ବାଲୁକୁ ଗୋଡେଇ ଗୋଡେଇ ସଂଘବଦ୍ଧ  ଭାବରେ ଆକ୍ରମଣ କରିଥିଲେ।

ଯାହା ଫଳରେ ବାଲୁ ଚେତା ଶୂନ୍ୟ ହୋଇ ନିକଟରେ ଥିବା ଓଡିଆରପି କଲୋନୀର ଏକ ଘର ସମ୍ମୁଖରେ ଅଚେତ ହୋଇ ପଡିଯାଇଥିଲେ। ଆକ୍ରମଣରେ ୩ ରୁ ଉର୍ଦ୍ଧ୍ବ ଯୁବକ ମଧ୍ୟ୍ୟ ଆହତ ହୋଇଥିଲେ। ଘଟଣା ପରେ  ଉଭୟ ଗୋଷ୍ଠୀର ଯୁବକ ମାନେ  ଘଟଣା ସ୍ଥଳରୁ ଭୟରେ ଫେରାର ସୋଇ ଯାଇଥିଲେ।ଘଟଣା ନେଇ   ଗୋଳନ୍ଥରା ଥାନା ରେ ଅଭିଯୋଗ ପରେ ପୁଲିସ ଘଟଣା ସ୍ଥଳରେ ପହଞ୍ଚି ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ବାଲୁ ସମେତ ଅନ୍ୟ ମାନଙ୍କୁ ବ୍ରହ୍ମପୁର ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି। ଚିକିତ୍ସାଧୀନ ଅବସ୍ଥାରେ ବାଲୁଙ୍କ ମୃତ୍ୟୁ ଘଟିଥିବା ପୁଲିସ ସୂଚନା ଦେଇଛି।