ଗୋପାଳପୁର: ରଙ୍ଗେଇଲୁଣ୍ଡା ବ୍ଲକ ଅନ୍ତର୍ଗତ ମାର୍କଣ୍ଡି ଠାରେ ଥିବା ବେକ ଓ୍ବାଟର ଓ ସମୁଦ୍ର ସଂଯୋଗ ପଥରେ ସବୁ ଦିନିଆ ମୁହାଣ ବ୍ୟବସ୍ଥା ନ ଥିବାରୁ ମତ୍ସ୍ୟଜୀବୀ ପରିବାରମାନେ ସେମାନଙ୍କ ଡଙ୍ଗା ଓ ଜାଲକୁ ବାତ୍ୟା ତଥା ଅନ୍ୟ ସମୟରେ ସୁରକ୍ଷିତ ଭାବେ ରଖିବାରେ ଅସୁବିଧା ହେଉଛନ୍ତି। ଏହାକୁ ନେଇ ଆଜି ଭାଜପା ଯୁବ ମୋର୍ଚ୍ଚା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଶୁଭାଶିଷ ସାହୁଙ୍କ ସମେତ ଏକ ଚାରି ଜଣିଆ ପ୍ରତିନିଧି ଦଳ ମାର୍କଣ୍ଡି ଠାରେ ପହଞ୍ଚି ମତ୍ସ୍ୟଜୀବୀଙ୍କ ସହ ଆଲୋଚନା କରିଥିଲେ। ଏଥି ସହ ଡଙ୍ଗାରେ ଯାଇ ଅସୁରକ୍ଷିତ ଅବସ୍ଥାରେ ନଦୀ କଡରେ ଥିବା କିଆ ଓ ଝାଉଁ ଗଛରେ ଡଙ୍ଗାକୁ ବାନ୍ଧି ରଖିଥିବା ଏବଂ ଡଙ୍ଗା ଉପରେ ହିଁ ଜାଲକୁ ବାନ୍ଧି ରଖିଥିବା ବୁଲି ଦେଖିଥିଲେ।
ସୂଚନାଯୋଗ୍ୟ ଯେ ଗତ ସାଧାରଣ ନିର୍ବାଚନ ପୂର୍ବରୁ ୨୦୧୯ ରେ ଗୋପାଳପୁର ଓ ମାର୍କଣ୍ଡି ଠାରେ ସବୁଦିନଆ ମୁହାଣ ନିର୍ମାଣ ନିମନ୍ତେ ବିଧାୟକଙ୍କ ପକ୍ଷରୁ ଭିତ୍ତି ପ୍ରସ୍ତର ପ୍ରଦାନ କରାଯାଇଥିଲା। କିନ୍ତୁ ଏହା ମଧ୍ୟରେ ୨ ବର୍ଷ ବିତିଯାଇଥିଲେ ସୁଦ୍ଧା ଆଜି ଯାଏଁ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇ ପାରିନାହିଁ। ବିଜେପି ଟିମର ଗସ୍ତ ସମୟରେ ମତ୍ସ୍ୟଜୀବୀମାନେ ମୁହାଣ ନଥିବାରୁ ମାଛ ମାରିବାକୁ ସମୁଦ୍ରକୁ ଯିବାରେ ଅସୁବିଧା ହେଉଥିବା ପ୍ରକାଶ କରିବା ସହ ବାତ୍ୟା ସମୟରେ ଡଙ୍ଗା ଓ ଜାଲକୁ ସୁରକ୍ଷିତ ସ୍ଥାନରେ ରଖିବାରେ ଅସୁବିଧା ହେଉଥିବା ଅଭିଯୋଗ କରିଥିଲେ। ଏହି ଟିମରେ ଅନ୍ୟମାନଙ୍କ ମଧ୍ୟରେ ୫୩ ନଂ ଜୋନ ଯୁବ ମୋର୍ଚ୍ଚା ସଭାପତି ଗୋପିନାଥ ମହାରଣା, ୫୩ ନଂ ଜୋନ ମଣ୍ଡଳ ସଭାପତି ସନତ ନାୟକ ଓ ଯୁବମୋର୍ଚ୍ଚା ଜିଲ୍ଲା ଉପ ସଭାପତି ଜଗନମୋହନ ପାତ୍ର ପ୍ରମୁଖ ଉପସ୍ଥିତ ରହିଥିଲେ।
