ଜୟପୁର: ରାଜସ୍ଥାନରେ ଗେହଲଟ୍-ପାଇଲଟ୍ କ୍ଷମତା ଲଢ଼େଇ ଏବେ ତୀବ୍ର । ଆରମ୍ଭରୁ ପାଇଲଟ ଗୋଷ୍ଠୀ ନିରବତା ଅବଲମ୍ବନ କରୁଥିବାବେଳେ ମୁଖର ଗେହଲଟ୍ ଏବେ ପାଇଲଟଙ୍କ ପରିବର୍ତ୍ତେ ବିଜେପିର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ତଥା ଗୃହମନ୍ତ୍ରୀ ଅମିତ୍ ଶାହାଙ୍କୁ ନିଶାଣ କରିଛନ୍ତି । ଅବଶ୍ୟ ଶାହାଙ୍କୁ ନିଶାଣ କରିବା ଅବସରରେ ସେ ପରୋକ୍ଷରେ ତାଙ୍କୁ ପ୍ରଖର ରାଜନୈତିଜ୍ଞ ବୋଲି ପ୍ରମାଣ କରି ସାରିଛନ୍ତି । ତାଙ୍କ ମନରେ ସବୁବେଳେ ଡ଼ର ଆସୁଛି ଶାହା କିଛି ନୂଆ ଯୋଜନା କଲେ କି ? ସରକାର ଭାଙ୍ଗିବାକୁ କିଛି ଆଉ ପଦକ୍ଷେପ ନେଲେ କି ? ଗତକାଲି ତାଙ୍କ ଗୋଷ୍ଠୀର କିଛି ବିଧାୟକ ଓ ମନ୍ତ୍ରୀ ନୂଆ ଠିକଣାରେ ପହଞ୍ଚିବାରେ ଟିକିଏ ବିଳମ୍ବ ହୋଇଗଲା ଯେ ଗେହଲଟ ଅଥୟ ହୋଇ ପଡ଼ିଥିଲେ । ସେମାନଙ୍କୁ ବାଟରୁ କୁଆଡ଼େ ଉଭାନ ହୋଇଯିବା ଆଶଙ୍କାରେ ତୁରନ୍ତ ଖୋଜାଖୋଜି ଆରମ୍ଭ କରି ଦେଇଥିଲେ ।
ନିଜେ ଗେହଲଟ୍ ଏ କଥା ସ୍ବୀକାର କରିଛନ୍ତି । ସେ କହିଛନ୍ତି ଯେ ଅମିତ୍ ଶାହାଙ୍କ ନାମ ବାରମ୍ବାର ମୁଁ ଏଇଥିପାଇଁ ନେଉଛି ଯେ ସରକାର ଭଙ୍ଗାଗଢ଼ାରେ ତାଙ୍କ ପରି ପ୍ରବୀଣ ଆଉ କେହି ନାହାନ୍ତି । କର୍ଣ୍ଣାଟକ ହେଉ ବା ମଧ୍ୟପ୍ରଦେଶ, ଗୋଆ, ମଣିପୁର, ଅରୁଣାଚଳ ପ୍ରଦେଶ ସବୁ କ୍ଷେତ୍ରରେ ବିଜେପି ପକ୍ଷରୁ ସେ ହିଁ ନେତୃତ୍ଵ ନେଇଛନ୍ତି । ଏଥିପାଇଁ ସେ ମଧ୍ୟ ରାଜସ୍ଥାନ ସରକାରକୁ ଭାଙ୍ଗିବାକୁ ବିଚାର କରିଥାଇ ପାରନ୍ତି ବୋଲି ଗେହଲଟ କହୁଛନ୍ତି । କେବଳ ସେତିକି ନୁହେଁ ସେ ଅମିତ୍ ଶାହାଙ୍କ ଉଦ୍ଦେଶ୍ୟରେ ମଧ୍ୟ ପ୍ରଶ୍ନ କରିଛନ୍ତି – ଅମିତ୍ ଶାହାଜୀ, ଆପଣଙ୍କୁ କ’ଣ ହୋଇଛି । ଆପଣ ଦିନରାତି, ନିଦରେ ବା ଜାଗ୍ରତରେ ସବୁ ସମୟରେ ବିରୋଧୀ ସରକାର ଭାଙ୍ଗିବାକୁ କିପରି ଭାବି ପାରୁଛନ୍ତି ?
ଅନ୍ୟପକ୍ଷରେ ଗେହଲଟ ନିଜ ସରକାର ଭାଙ୍ଗିବା ଆଶଙ୍କାରେ ଅସହାୟ ହୋଇ ପଡ଼ିଥିବା ମନେ କରାଯାଉଛି । ସେ କହିଛନ୍ତି ଯେ ନିର୍ବାଚିତ ସରକାରକୁ ଯଦି ଏପରି ଭଙ୍ଗାଯାଏ ତେବେ ଦେଶରେ ଲୋକତନ୍ତ୍ର ବଞ୍ଚିବ କିପରି ? ସାରା ଦେଶରେ ଗଣତନ୍ତ୍ର ବଞ୍ଚାଅ ଅଭିଯାନ ଆରମ୍ଭ ହୋଇଛି । ଗଣତନ୍ତ୍ର ବଞ୍ଚିଲେ ଦେଶ ବଞ୍ଚିବ । ରାଜନୈତିକ ଦଳ ଆସିବେ, ଯିବେ । ସରକାର ଗଠନ ହେବ, ଭାଙ୍ଗିବ । ବ୍ୟକ୍ତିବିଶେଷ ଆସିବେ, ଯିବେ । ମାତ୍ର ଗଣତନ୍ତ୍ର ନ ରହିଲେ ଦେଶର କଣ ହେବ ବୋଲି ପ୍ରଶ୍ନ କରିଛନ୍ତି ଗେହଲଟ ।
ଏହି ଅବସରରେ ସେ ପ୍ରଥମଥର ପାଇଁ କଂଗ୍ରେସର ବିଦ୍ରୋହୀ ବିଧାୟକମାନଙ୍କ ପ୍ରତି ନରମ ମନୋଭାବ ପୋଷଣ କରିଥିବା ନଜରକୁ ଆସିଛି । ସେ କହିଛନ୍ତି ରାଜସ୍ଥାନରେ ଯେଉଁ ଲୋକମାନେ ସରକାରରେ ଅସ୍ଥିରତା ସୃଷ୍ଟି କରିଛନ୍ତି ସେମାନେ ଯଦି ହାଇକମାଣ୍ଡଙ୍କ ନିକଟରେ ନିଜର ଦୋଷ ସ୍ବୀକାର କରିବେ ଓ ତାଙ୍କୁ ଯଦି ହାଇକମାଣ୍ଡ କ୍ଷମା କରିଦେବେ ତେବେ ମୁଁ ମଧ୍ୟ ସେମାନଙ୍କୁ କୋଳେଇ ନେବି । ବିଜେପି ସରକାର ଭାଙ୍ଗିବା ଖେଳ ଖେଳୁଛି ଓ ଗଣତନ୍ତ୍ରକୁ ବଞ୍ଚାଇବା ପାଇଁ ମୋତେ ଏପରି କରିବାକୁ ପଡ଼ୁଛି ବୋଲି କହିଛନ୍ତି ଗେହଲଟ୍।
