ଗଞ୍ଜାମ: କୋଭିଡ ନିୟନ୍ତ୍ରଣ ଲାଗି ସରକାର ବୁଷ୍ଟର ଡୋଜ ଉପରେ ଗୁରୁତ୍ବ ଦେଉଛନ୍ତି । ତେଣୁ ସମସ୍ତ ସ୍ଥାନରେ ଟିକାକରଣ କରାଯାଉଛି । ଟିକାଦାତାଙ୍କୁ ପ୍ରୋତ୍ସାହିତ ଉଦ୍ଦେଶ୍ୟରେ ଏକ ନିଆରା ପ୍ରୟାସ ଆରମ୍ଭ କରିଛି ଗଞ୍ଜାମ ସହରର ଭରସା ଅନୁଷ୍ଠାନ । କରୋନାର ବୁଷ୍ଟର ଡୋଜକୁ କିପରି ଅଧିକରୁ ଅଧିକ ଲୋକଙ୍କୁ ଦିଆଯାଇପାରିବ ସେନେଇ ଲଟେରୀ ମାଧ୍ୟମରେ ପୁରସ୍କାର ପ୍ରଦାନ କରି ଉତ୍ସାହିତ କରୁଛନ୍ତି ।
ସ୍ୱାଧୀନତାର ୭୫ ବର୍ଷ ପୂର୍ତ୍ତି ଉପଲକ୍ଷେ ଓ ଅମୃତ ମହୋତ୍ସବ ଅବସରରେ ବୁଷ୍ଟର ଡୋଜକୁ ନେଇ ସଚେତନତା ଓ ପ୍ରୋତ୍ସାହିତ କରିବା ପରିପ୍ରେକ୍ଷୀରେ ଭରସା ଅନୁଷ୍ଠାନର ସମ୍ପାଦକ ଦୁର୍ଗା ମାଧବ ପାଣିଗ୍ରାହୀ ଓ ସଭାପତି ଆଇନଜୀବୀ ଦିଲ୍ଲୀପ କୁମାର ପଟ୍ଟନାୟକଙ୍କ ତତ୍ତ୍ୱାବଧାନରେ ଗୋଟିଏ ଦିନ ବୁଷ୍ଟର ଡୋଜ ଦେଇଥିବା ସମସ୍ତ ଟିକାଦାତାଙ୍କ ନାମରେ ଲଟେରୀ କରାଯାଇଥିଲା ।
ଏହି ଲଟେରୀକୁ ଭରସା ଅନୁଷ୍ଠାନ ଉପଦେଷ୍ଟା ଡ. ସବିତା ରାଣୀ ଦାସଙ୍କ ସଂଯୋଜନାରେ ଟିକାପ୍ରଦାନ କରୁଥିବା ମହିଳା ସ୍ୱାସ୍ଥ୍ୟକର୍ମୀ ସରସ୍ୱତୀ ମହାଅଙ୍ଗୁଡ଼, ବାବୁ ପ୍ରଧାନଙ୍କ ଉପସ୍ଥିତିରେ ତିନିଜଣ ଟିକାଦାତାଙ୍କ ନାମ ଗଞ୍ଜାମ ଆଇଆଇସି ସୁଦୀପ୍ତ କୁମାର ସାହୁ ବାହାର କରିଥିଲେ । ସେମାନଙ୍କ ମଧ୍ୟରୁ ପ୍ରଥମ ବିଜେତା ଛଅ ନମ୍ବର ଉପଭୋକ୍ତା ଗଞ୍ଜାମ ଏନଏସିର ପୁଇଁତୋଳା ଗ୍ରାମର ଅଶୋକ ପଲେଇଙ୍କୁ ଆଇରନ ବକ୍ସ, ୨ୟ ବିଜେତା ୪୧ ନମ୍ବର ଟିକାଦାତା ଗଞ୍ଜାମ ସହରର କରଣସାହିର ତନ୍ମୟୀ ପଣ୍ଡାଙ୍କୁ ଫୋଲଡିଙ୍ଗ ଛତା ଓ ତୃତୀୟ ବିଜୟୀ ୨୪ ନମ୍ବର ଟିକାଦାତା ହେଲେ ଗଂଜାମ ବ୍ଲକ ସାନକାଇଁଛପୁର ଗ୍ରାମର ସୁମିତ୍ରା ନାୟକଙ୍କୁ ଫୋଲଡିଂ ଛତା ପ୍ରଦାନ କରାଯାଇଥିଲା । ସମ୍ମାନୀତ ଅତିଥି ରୂପେ ଗଞ୍ଜାମ ଥାନା ସେକେଣ୍ଡ ଅଫିସର ଅଜିତ କୁମାର ପରିଡା ଯୋଗ ଦେଇଥିଲେ । ଅନ୍ୟ ମାନଙ୍କ ମଧ୍ୟରେ ସ୍ୱେଚ୍ଛାସେବୀ ବସନ୍ତ କୁମାର ସାହୁ, ସାମା ରେଡ୍ଡୀ, ପ୍ରଭାତ ବିଶ୍ବାଳ, ପ୍ରଭାତ ସାହୁ , ଵିନୋଦ ଚନ୍ଦ୍ରପଲେଇ, ସୀମାଞ୍ଚଳ ଦାସ, ଅଖିଳ ତରାଇ ଉପସ୍ଥିତ ରହି ଉତ୍ସାହିତ କରିଥିଲେ। ଅନୁଷ୍ଠାନ ଭରସାର ଏହି ଭିନ୍ନ ପ୍ରୟାସ ଓଡ଼ିଶାରେ ପ୍ରଥମ ହୋଇଥିବାରୁ ବିଭନ୍ନ ମହଲରେ ପ୍ରଶଂସା କରାଯାଇଛି।
Comments are closed.