ସୁଆଣ୍ଡୋ : ସତ୍ୟବାଦୀ ବ୍ଲକ ଅଧୀନ ବିଭିନ୍ନ ଗାଁ ଗହଳି ସହିତ ବଜାର ଆଦି ସ୍ଥାନ ଗୁଡିକରେ କୁମାରପୂର୍ଣ୍ଣିମା ସହିତ ମା ଗଜଲକ୍ଷ୍ମୀଙ୍କ ପୂଜା ଅନୁଷ୍ଠିତ ହୋଇଛି। ଏହି ପରିପ୍ରେକ୍ଷୀରେ ଗ୍ରାମ ଗୁଡିକରେ ପୂର୍ଣ୍ଣିମାର ସନ୍ଧ୍ୟାରେ ନୂତନ ପୋଷାକ ପରିଧାନ କରି କୁମାରୀମାନଙ୍କ ମଧ୍ୟରେ ନାଚ, ଗୀତ, ବାଦ୍ୟର ଆସର ଜମିଥିଲା। ଗଜଲକ୍ଷ୍ମୀଙ୍କ ପାଖରେ ସକାଳେ ବାଳଭୋଗ ଦ୍ୱିପ୍ରହର ଧୂପ ରାତିରେ ଅନ୍ନ, ଡାଲି, ବେସର, କ୍ଷୀରି, ମିଠା ଆଦି ଭୋଗ କରାଯାଇଛି। କେତେକ ମଣ୍ଡପ ନିକଟରେ ସଙ୍ଗୀତ ଆସର ମଧ୍ୟ କରାଯାଉ ଥିବାର ଦେଖିବାକୁ ମିଳିଛି। ବ୍ରାହ୍ମଣଙ୍କ ଦ୍ୱାରା ପୂଜା ମଣ୍ଡପରେ ବିରାଜମାନ କରିଥିବା ମା’ ଲକ୍ଷ୍ମୀଙ୍କର ପୂଜାର୍ଚ୍ଚନା କରାଯାଉଛି। ସନ୍ଧ୍ୟାବେଳକୁ ଲୋକ ଗହଳି ଲାଗିରହୁଛି। ଦୂର୍ଗାପୂଜା ସରିବା ପରେ ପରେ ଗଜଲକ୍ଷ୍ମୀଙ୍କ ପୂଜା ଉତ୍ସବକୁ ସମସ୍ତେ ମନଭରି ଉପଭୋଗ କରୁଥିବାର ଦେଖାଯାଇଛି।
