ମୁମ୍ବଇ: ସନ୍ନି ଦେଓଲଙ୍କ ‘ଗଦର୍ ୨’ ବକ୍ସ ଅଫିସ୍ରେ ସଫଳ ସାବ୍ୟସ୍ତ ହୋଇଛି। ଏହା ଦ୍ରୁତତମ ଆୟ କରିବାର ରେକର୍ଡ ସୃଷ୍ଟି କରିଛି। ୪୫୦ କୋଟି ଟଙ୍କାର ବ୍ୟବସାୟ ସହିତ ଏହା ଭାରତୀୟ ସିନେମା ଇତିହାସରେ ତୃତୀୟ ସର୍ବାଧିକ ଆୟ କରିଥିବା ଚଳଚ୍ଚିତ୍ର ପାଲଟିଛି। ଫିଲ୍ମ ରିଲିଜ୍ ହେବା ଦିନରୁ ବକ୍ସ ଅଫିସରେ ହଇଚଇ ସୃଷ୍ଟି କରିଛି ଏବଂ ଏହା ଥମିବାର ନାଁ ନେଉନାହିଁ। ‘ଗଦର୍ ୨’କୁ ପ୍ରଶଂସକ ଜବରଦସ୍ତ ଓ ନିରନ୍ତର ଭଲପାଇବା ଦେଇଥିବାରୁ ନିର୍ମାତା ରକ୍ଷା ବନ୍ଧନ ଅବସରରେ ସେମାନଙ୍କୁ ବିଶେଷ ଉପହାର ଦେବାକୁ ନିଷ୍ପତ୍ତି ନେଇଛନ୍ତି।
ଚଳଚ୍ଚିତ୍ରରେ ପରିବାରର ଭଲପାଇବା ଓ ଶକ୍ତି ପ୍ରଦର୍ଶିତ ହୋଇଛି। ତେଣୁ ‘ଗଦର ୨’ର ପାରିବାରିକ ଉତ୍ସବ ପାଳନ ପାଇଁ ନିର୍ମାତା ରକ୍ଷାବନ୍ଧନ ଅବସରରେ ଏକ ବିଶେଷ ଉପହାର ଘୋଷଣା କରିଛନ୍ତି। ସିନେପ୍ରେମୀ ୨ଟି ଟିକେଟ୍ କିଣି ଆଉ ୨ଟି ମାଗଣା ପାଇପାରିବେ। ଏହି ଅଫର୍ ଅଗଷ୍ଟ ୨୯ରୁ ସେପ୍ଟେମ୍ବର ୩ ପର୍ଯ୍ୟନ୍ତ ରହିଛି। ଫିଲ୍ମକୁ ନେଇ ଦର୍ଶକଙ୍କ ଉତ୍ସାହକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ନିର୍ମାତା-ନିର୍ଦ୍ଦେଶକ ଅନିଲ ଶର୍ମା ନିର୍ଦ୍ଦେଶିତ ତଥା ଜୀ ଷ୍ଟୁଡିଓ ଦ୍ୱାରା ନିର୍ମିତ ଏହି ଚଳଚ୍ଚିତ୍ରରେ ସୁପରଷ୍ଟାର ସନ୍ନି ଦେଓଲ ଏବଂ ଅମିଶା ପଟେଲ ମୁଖ୍ୟ ଭୂମିକାରେ ଅଭିନୟ କରିଛନ୍ତି।
