ଡେସ୍କ: କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର କହିଛନ୍ତି ଯେ ବୈଜ୍ଞାନିକ ଜ୍ଞାନ ଓ କୃଷି କ୍ଷେତ୍ରରେ ତାହାର ନିବେଶ କୃଷକମାନଙ୍କ ନିକଟରେ ପହଂଚିବା ଉପରେ କୃଷି କାର୍ଯ୍ୟଗୋଷ୍ଠୀ ଗୁରୁତ୍ୱାରୋପ କରିଛନ୍ତି। ଆଜି ଜି-୨୦ ବୈଠକର ଶେଷ ଦିନରେ ହାଇଦ୍ରାବାଦରେ ଗଣମାଧ୍ୟମକୁ ସୂଚନା ଦେଇ କେନ୍ଦ୍ର ମନ୍ତ୍ରୀ କହିଛନ୍ତି ଯେ ସ୍ମାର୍ଟ ପ୍ରଯୁକ୍ତିବିଦ୍ୟା ସମ୍ପନ୍ନ କୃଷି ପାଇଁ ଜି-୨୦ ଦେଶଗୁଡିକ ସହମତ ହୋଇଛନ୍ତି।
ସେ କହିଛନ୍ତି ଯେ ତିନି ଦିନିଆ ବୈଠକରେ କୃଷି ସଙ୍କଟ ସମସ୍ୟାର ସମାଧାନ, ଅତ୍ୟାଧୁନିକ ଜ୍ଞାନକୌଶଳ ବ୍ୟବହାର, ଡିଜିଟାଲ ଉପକରଣର ବ୍ୟବହାର ଏବଂ ମିଲେଟର ପ୍ରଚାର ପ୍ରସାର ଉପରେ ମଧ୍ୟ ଆଲୋଚନା କରାଯାଇଛି। ସେ କହିଛନ୍ତି, କୃଷି ଉପରେ ତିନି ଦିନିଆ ଜି-୨୦ କାର୍ଯ୍ୟ ଗୋଷ୍ଠୀ ମଧ୍ୟରେ କୃଷି ସଙ୍କଟ, ଜଳବାୟୁ ପରିବର୍ତ୍ତନ, ଜୈବ ବିବିଧତା ଏବଂ ପରିବେଶ ପ୍ରସଙ୍ଗରେ ସମସ୍ତ ଅଂଶଗ୍ରହଣକାରୀ ଦେଶ ଭାରତକୁ ସମର୍ଥନ କରିଛନ୍ତି। ଭାରତ ବିଶ୍ୱର ନେତୃତ୍ୱ ନେବ ଏବଂ ଏହି ପ୍ରସଙ୍ଗରେ ବିଶ୍ୱକୁ ଦିଗଦର୍ଶନ ଦେବ ବୋଲି ସେ କହିଛନ୍ତି।
