ଭୁବନେଶ୍ୱର : ଓଡ଼ିଶାର ବନ କର୍ମଚାରୀମାନଙ୍କୁ ଗୁଳି ଚଳାଇବା ପାଇଁ ଆଇନଗତ କ୍ଷମତା ମିଳିଛି । ସଂରକ୍ଷିତ ଜଙ୍ଗଲ ବା ଅଭୟାରଣ୍ୟ ଭିତରେ ଶିକାରୀମାନେ ଆଉ ବନ କର୍ମଚାରୀମାନଙ୍କୁ ବେଆଇନ ବନ୍ଧୁକ ଦେଖେଇ ଡରେଇ ଖସି ପାରିବେ ନାହିଁ। ଏଥର ବେଆଇନ ବନ୍ଧୁକ ଗୁଳିର ଜବାବ ଦେବା ପାଇଁ ବନ କର୍ମଚାରୀମାନଙ୍କୁ ଧରେଇ ଦିଆଯିବ ସରକାରୀ ବନ୍ଧୁକ ଓ ଗୁଳିଗୋଳା। ଶିକାରୀ ଯଦି ପ୍ରାଣ ହରାଏ ତା’ହେଲେ ଆଉ ଚିନ୍ତା କରିବାର କାରଣ ନାହିଁ। କାରଣ ଓଡ଼ିଶାର ବନରକ୍ଷୀ ଏବଂ ତଦୁର୍ଦ୍ଧ୍ବ ସମସ୍ତ ବନ ଅଧିକାରୀଙ୍କୁ ବନ୍ଧୁକ ଚାଳନା କ୍ଷମତା ପ୍ରଦାନ କରିଛି ରାଜ୍ୟ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ। ରାଜ୍ୟପାଳଙ୍କ ନିର୍ଦେଶରେ ବୁଧବାର ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ପକ୍ଷରୁ ଏ ସଂକ୍ରାନ୍ତରେ ବିଜ୍ଞପ୍ତି ପ୍ରକାଶ ପାଇଛି। ଏହି କ୍ଷମତା ବଳରେ ଯଦି କେହି ବନ ଅଧିକାରୀ ଶିକାରୀ ବା ଅନ୍ୟ କେହି ଦୁର୍ବୃତ୍ତଙ୍କୁ ଗୁଳି ମାରନ୍ତି ତେବେ ସେମାନଙ୍କୁ ଗିରଫଦାରୀର ଭୟ ନାହିଁ। ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ୍ ସ୍ତରୀୟ ତଦନ୍ତ ହେବା ପରେ ଯଦି ସଂପୃକ୍ତ ବନ ଅଧିକାରୀ ଦୋଷୀ ସାବ୍ୟସ୍ତ ହେବେ, ତେବେ ଯାଇ ପୁଲିସ ବନ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ। ତଦନ୍ତ ନ ସାରି ସଂପୃକ୍ତ ବନ ଅଧିକାରୀ ଦୋଷୀ ସାବ୍ୟସ୍ତ ନ ହେବା ପର୍ଯ୍ୟନ୍ତ ନିର୍ଦୋଷ ବୋଲି ବିବେଚନା କରାଯିବ ଏବଂ ପୁଲିସ ତାଙ୍କୁ ଗିରଫ କରିପାରିବ ନାହିଁ।
ଏହାଦ୍ବାରା ରାଜ୍ୟର ସଂରକ୍ଷିତ ଜଙ୍ଗଲ ଏବଂ ଅଭୟାରଣ୍ୟଗୁଡ଼ିକର ଉପଯୁକ୍ତ ସୁରକ୍ଷା କରାଯାଇପାରିବ। ସୂଚନାଯୋଗ୍ୟ, ବନରକ୍ଷୀ ଓ ଅନ୍ୟ ବନ କର୍ମଚାରୀଙ୍କର ଗୁଳି ଚଳାଇବା କ୍ଷମତା ନ ଥିବାରୁୁ ନିକଟରେ ଶିମିଳିପାଳ ଅଭୟାରଣ୍ୟରେ ଶିକାରୀଙ୍କ ଗୁଳିରେ ଦୁଇଜଣ ବନ କର୍ମଚାରୀଙ୍କର ମୃତ୍ୟୁ ଘଟିଥିଲା। ତାହା ପୂର୍ବରୁ ଶିମିଳିପାଳ ଏବଂ ରାଜ୍ୟର ଅନ୍ୟ ସଂରକ୍ଷିତ ଜଙ୍ଗଲରୁ ବହୁ ହାତୀ, ବାଘ ଆଦି ବନ୍ୟପ୍ରାଣୀ ଶିକାର କରାଯାଇ ସେଗୁଡ଼ିକର ଚମଡ଼ା ଓ ଶରୀରର ବିଭିନ୍ନ ଅଂଶ ଚୋରାରେ ବିକ୍ରି କରି ଚୋରା ବେପାରୀ ବିପୁଳ ଅର୍ଥ ରୋଜଗାର କରୁଛନ୍ତି।
Comments are closed.