ୱାଶିଂଟନ: ଫେସବୁକରେ ସିଧା ଭିଡିଓ ପ୍ରସାରଣ (ଲାଇଭ ଷ୍ଟ୍ରିମିଙ୍ଗ) ବ୍ୟବସ୍ଥାରେ ଆଂଶିକ ପ୍ରତିବନ୍ଧକ ଲାଗୁ ହେବ। ବହୁଳ ବ୍ୟବହୃତ ସାମାଜିକ ଗଣମାଧ୍ୟମ ଫେସବୁକର ମୁଖ୍ୟ କାର୍ଯ୍ୟକାରୀ ଅଧିକାରୀ ସେରିଲ ସ୍ୟାଣ୍ଡବର୍ଗ କହିଛନ୍ତି, ନ୍ୟୁଜିଲାଣ୍ଡ ମସଜିଦରେ ସଂଗଠିତ ଗୁଳିକାଣ୍ଡର ଭିଡିଓ ସିଧା ପ୍ରସାରଣ ହେବା ପରେ ଲାଇଭ ଷ୍ଟ୍ରିମିଙ୍ଗ ବ୍ୟବସ୍ଥାରେ ଆଂଶିକ ପ୍ରତିବନ୍ଧକ ଲାଗୁ କରିବା ନେଇ ବିଚାର ବିମର୍ଶ ଚାଲିଛି। ଏଥି ପାଇଁ କେଉଁ ପ୍ରକାର ପ୍ରତିବନ୍ଧକ ଲାଗୁ କରାଯିବ ଓ ତାହା କିଭଳି ସମ୍ବେଦନଶୀଳ ଭିଡ଼ିଓର ସିଧା ପ୍ରସାରଣକୁ ରୋକି ପାରିବ, ସେ ସମ୍ପର୍କରେ ପରୀକ୍ଷା ନିରୀକ୍ଷା ଚାଲିଥିବା ସେ କହିଛନ୍ତି।
ନ୍ୟୁଜିଲାଣ୍ଡ ମସଜିଦରେ ସଂଗଠିତ ଗୁଳିକାଣ୍ଡର ଭିଡିଓ ସିଧା ପ୍ରସାରଣ ହେବା ପରେ ଏହାକୁ ପ୍ରାୟ ୨୦୦ ଜଣ ୧୭ ମିନିଟ ପର୍ଯ୍ୟନ୍ତ ଦେଖିଥିଲେ ମଧ୍ୟ ମାତ୍ର ଜଣେ ଦର୍ଶକ ଏ ନେଇ ଅଭିଯୋଗ କରିଥିଲେ। ପରେ ଫେସବୁକ ମୂଳ ଭିଡିଓକୁ ସର୍ଭରରୁ ଅପସାରଣ କରିବା ସହ ୨୪ ଘଣ୍ଟା ମଧ୍ୟରେ ସେହି ଭିଡ଼ିଓର ଦେଢ଼ କୋଟି କପିକୁ ଅପଲୋଡ଼ ହେବାରୁ ବନ୍ଦ ରଖିଥିଲେ ଓ ୩୦ହଜାର ଭିଡ଼ିଓ ଡିଲିଟ କରିଥିଲେ।