ଡେସ୍କ: କଂଗ୍ରେସ ଗୁରୁବାର ଦିନ କହିଛି ଯେ ହିମାଚଳ ପ୍ରଦେଶ ଏବଂ ଗୁଜରାଟ ବିଧାନସଭା ନିର୍ବାଚନ ପାଇଁ ଗୋଟିଏ ଦିନ ଗଣତି ହେବାକୁ ଥିବା ବେଳେ କାହିଁକି ପୃଥକ ତାରିଖରେ ଭୋଟ୍ ଘୋଷଣା କରାଯାଇଛି, ସେନେଇ ନିର୍ବାଚନ ଆୟୋଗ ଦେଶର ଲୋକଙ୍କୁ ସ୍ପଷ୍ଟୀକରଣ ଦେବା ଆବଶ୍ୟକ। ଗୁଜୁରାଟ କଂଗ୍ରେସର ଦାୟିତ୍ୱରେ ଥିବା ରଘୁ ଶର୍ମା ଅଭିଯୋଗ କରିଛନ୍ତି ଯେ ସରକାରୀ ଖର୍ଚ୍ଚରେ ବିଜେପିକୁ ଅନେକ ରାଲି କରିବା ପାଇଁ ସମୟ ମିଳିଥିଲା ଏବଂ ଗୁଜୁରାଟରେ ଜନସାଧାରଣଙ୍କ ସମ୍ବଳର ଅପବ୍ୟବହାର କରାଯାଇଥିଲା। ଗୁଜୁରାଟ ବିଧାନସଭା ପାଇଁ ଡିସେମ୍ବର ୧ ଓ ୫ ତାରିଖରେ ଓ ହିମାଚଳ ପ୍ରଦେଶ ବିଧାନସଭା ପାଇଁ ନଭେମ୍ବର ୧୨ରେ ମତଦାନ ହେବାକୁ ଥିବା ବେଳେ ଉଭୟ ବିଧାନସଭା ପାଇଁ ଡିସେମ୍ବର ୮ରେ ମତଗଣନା ହେବ।
ଏଆଇସିସି ମୁଖ୍ୟାଳୟରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ସେ କହିଛନ୍ତି, ବିଜେପି ନେତୃତ୍ୱାଧୀନ ସରକାରଙ୍କ ଚାପ ସତ୍ତ୍ୱେ ଗୁଜରାଟ ନିର୍ବାଚନ ଘୋଷଣା କରିଥିବାରୁ ନିର୍ବାଚନ ଆୟୋଗଙ୍କୁ ଧନ୍ୟବାଦ ଦେବାକୁ ଚାହୁଁଛନ୍ତି। ଶର୍ମା କହିଛନ୍ତି ଯେ ନିର୍ବାଚନ ଆୟୋଗ ଏକ ସାମ୍ବିଧାନିକ ସଂସ୍ଥା ଭାବରେ ଏକ ସ୍ପଷ୍ଟୀକରଣ ଦେବା ଉଚିତ ଯେ ଉଭୟ ରାଜ୍ୟରେ ଯଦି ନିର୍ବାଚନ ପାଇଁ ଭୋଟ୍ ଗଣତି ଗୋଟିଏ ଦିନରେ ହେବ, ତେବେ କାହିଁକି ଭିନ୍ନ ତାରିଖରେ ନିର୍ବାଚନ ଘୋଷଣା କରାଯାଇଛି।
ମୋର୍ବି ଝୁଲାପୋଲ ଭୁଶୁଡ଼ିବା ନେଇ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସମାଲୋଚନା କରିଛନ୍ତି। ସେ କହିଛନ୍ତି ଯେ ଯେତେବେଳେ ଏହି ଦୁଖଦଃ ଘଟଣା ଘଟିଲା ସେତେବେଳେ କଂଗ୍ରେସ ସମସ୍ତ ରାଜନୈତିକ କାର୍ଯ୍ୟକ୍ରମକୁ ବାତିଲ କରିଦେଇଥିଲା କିନ୍ତୁ ପ୍ରଧାନମନ୍ତ୍ରୀ ସରକାରୀ କାର୍ଯ୍ୟକ୍ରମ କରିଥିଲେ।
