ରେଙ୍ଗାଲିକ୍ୟାମ୍ପ: ଅତାବିରା ମୁସଲିମ ସମାଜ ତରଫରୁ ଅତାବିରା ଇଦଗାହରେ ଗୁରୁବାର ସମାନତା ଓ ସୌହାର୍ଦ୍ଦ୍ୟର ପର୍ବ ଇଦ୍-ଉଲ୍-ଫିତର୍ ପାଳିତ ହୋଇଯାଇଛି । ଲଗାତାର ୩୦ ଦିନ ପର୍ଯ୍ୟନ୍ତ ଉପବାସ ରହି ପ୍ରତ୍ୟେକ ମୁସଲିମ ଧର୍ମାବଲମ୍ବୀ ପ୍ରତିଦିନ ‘ତରାବୀ ନମାଜ୍’ ସାମୂହିକ ଭାବେ ମସଜିଦରେ ପାଠ କରିବାସହ ଏହି ରମଜାନ୍ ମାସରେ ସମସ୍ତେ ନିଜ ନିଜର ରୋଜଗାର ଓ ଧନ ସମ୍ପତ୍ତିର ସଞ୍ଚୟ ଅନୁସାରେ ସଦକା, ଫିତରା ଓ ଜକାତ୍ ନାମରେ ଦାନ କରନ୍ତି । ‘ସଦକା’ ନାମରେ ସମସ୍ତେ ନିଜ ମନଖୁସି ଅନୁସାରେ କପଡ଼ା, ଲୁଗାପଟା, ଖାଦ୍ୟ, ଟଙ୍କା ପଇସା ଗରିବ ଲୋକଙ୍କୁ ସାହାଯ୍ୟ ଅର୍ଥେ ଦାନ କରନ୍ତି ଓ ‘ଫିତରା’ ନାଁରେ ସମସ୍ତେ ନିଜ ପରିବାର ସଦସ୍ୟଙ୍କ ସଂଖ୍ୟା ଅନୁସାରେ ମୁଣ୍ଡ ପିଛା ୭୦ ଟଙ୍କା ଲେଖାଏଁ ବାହାର କରି ଗରୀବ ଲୋକଙ୍କୁ ଦାନ କରିଥାନ୍ତି। ସେହିପରି ‘ଜକାତ’ ନାମରେ ପ୍ରତ୍ୟେକ ବ୍ୟକ୍ତି ନିଜର ରୋଜଗାର ଓ ଜମା ସମ୍ପତ୍ତିର ୨.୫% ଭାଗ ଗରୀବ ଓ ଅସହାୟ ପରିବାର ଅଥବା ବ୍ୟକ୍ତିକୁ ବାଧ୍ୟତାମୂଳକ ଭାବେ ଦାନ କରିଥାନ୍ତି ।
ଏହି ଇଦ୍-ଉଲ୍-ଫିତର୍ ନମାଜ ପାଠ କରିବା ପୂର୍ବରୁ ନିଜର ସଦକା, ଜକାତ, ଓ ଫିତରା ଦାନ ସମ୍ପୂର୍ଣ୍ଣ ଭାବେ କରିବା ପାଇଁ ସମସ୍ତ ମୁସଲିମ୍ ବ୍ୟକ୍ତି ବାଧ୍ୟ ହୋଇଥାନ୍ତି। ଯାହା ଏହି ପର୍ବ ଇଦ୍-ଉଲ୍-ଫିତରର ପ୍ରକୃତ ଅର୍ଥ । ଆଜି ଅତାବିରାରେ ଖୁସି ଓ ଉଲ୍ଲାସର ସହିତ ଇଦ୍-ଉଲ୍-ଫିତର୍ ପର୍ବ ପାଳନ ଅବସରରେ ଅତାବିରା ମୁସଲିମ ସମାଜ ଓ ସମାଜର ଦାୟିତ୍ବବାନ ବ୍ୟକ୍ତି ଉପସ୍ଥିତ ରହି ନମାଜ ପାଠ କରି ପରସ୍ପର ଆଲିଙ୍ଗନ ପୂର୍ବକ ଭାବର ଆଦାନ ପ୍ରଦାନ କରି ଇଦ୍-ଉଲ୍-ଫିତର୍ ପର୍ବକୁ ପାଳନ କରିଥିଲେ ।
